2025-yilgi Klublar o‘rtasidagi Jahon chempionati finalida Angliyaning “Chelsi” va Fransiyaning “PSJ” jamoalari o‘zaro bahs olib borishdi. Hal qiluvchi uchrashuv AQShning “MetLife” stadionida bo‘lib o‘tdi. Unda “Chelsi” 3:0 hisobida g‘alaba qozonib, bosh sovrinni qo‘lga kiritdi.
London klubi ilk bo‘limdayoq o‘yin taqdirini hal qildi. 22-daqiqada Koul Palmer hisobni ochdi. Oradan 8 daqiqa o‘tib, u ikkinchi bor Parij klubi darvozasini ishg‘ol qildi. 43-daqiqada esa Joao Pedro uchinchi golni urib, jamoasining g‘alabasini deyarli kafolatladi.
Ikkinchi bo‘lim ham keskin kurashlar ostida o‘tdi. “PSJ” hisobni qisqartirishga urinib, bir nechta xavfli hujumlar uyushtirdi, biroq ularning barchasi samarasiz yakunlandi.
O‘yinning 86-daqiqasida parijliklar futbolchisi Joau Nevesh “Chelsi” himoyachisi Mark Kukurelyani sochidan tortgani uchun to‘g‘ridan-to‘g‘ri qizil kartochka oldi.
Shu tariqa, “Chelsi” ilk bo‘limda urilgan gollar evaziga yirik hisobda g‘alaba qozonib, yangi formatdagi Klublar o‘rtasidagi Jahon chempionatining ilk chempioniga aylandi.
Klublar o‘rtasidagi Jahon chempionati
Final
14-iyul, dushanba
“Chelsi” — “PSJ” 3:0
Gollar: 1:0 — Palmer (22), 2:0 — Palmer (30), 3:0 — Pedro (43)
Izoh (0)