AQSH prezidenti Donald Trampning ruhiyatida yoshga aloqador o‘zgarishlar kuzatilmoqda. Bu haqda Markaziy razvedka boshqarmasining sobiq tahlilchisi Larri Jonson YouTube’dagi Judging Freedom kanaliga bergan intervyusida ma’lum qildi.
“Aqliy jihatdan nimadir noto‘g‘ri. Men so‘nggi 18 oy davomida Tramp bilan tez-tez uchrashgan bir kishi bilan suhbatlashdim — manbamni oshkor qilmayman. So‘nggi uchrashuvlarda yosh bilan bog‘liq sezilarli o‘zgarishlar kuzatildi”, dedi u.
Ekspertning ta’kidlashicha, omma oldidagi xatti-harakatlaridan tortib so‘zlash uslubigacha — barcha belgilar kognitiv funksiyalarning tezlik bilan yomonlashayotganini ko‘rsatmoqda va Amerika rahbari endi xalqaro ahamiyatga ega jiddiy ishlar bilan shug‘ullana olmaydi.
“U bilan muhim bitimlar tuzish imkonsizligi hammaga ayon”, deya izoh berdi tahlilchi.
“U o‘yinlar o‘ynayapti. Qurol bilan, Ukrainadagi urush bilan, Rossiya esa uning ustidan kulmoqda”, deb ta’kidladi Jonson.
So‘nggi paytlarda ommaviy axborot vositalari Trampning aqliy qobiliyatlari yomonlashishi mumkinligi haqida xabar bermoqda. Iyul oyi boshida Britaniyaning Daily Star gazetasi Oq uy rahbari Floridada Alligator Alkatras migrantlarni saqlash markazi ochilishiga bag‘ishlangan matbuot anjumanidagi javobidan so‘ng unda demensiya bo‘lishi mumkinligi haqida shubha paydo bo‘lgani haqida yozgan edi.
Aniqlanishicha, Trampdan hibsga olinganlar markazda qancha vaqt qolishi haqida so‘ralganda, Oq uy rahbari u yerda ko‘p vaqt o‘tkazishini va Florida uning ona shtati ekanini aytgan.
AQSH prezidenti Donald Tramp Rossiya bo‘yicha “muhim bayonot” berishini ma’lum qilgandi.
Izoh (0)