AQSH prezidenti Donald Tramp amalda Rossiya va Ukrainaga nisbatan yangi chora-tadbirlar ko‘rish niyatini bildirdi, ammo aniq nimalar nazarda tutilgani haqida ma’lumot bermadi. Translyatsiyani C-SPAN telekanali olib bordi.
Jurnalistlar Amerika rahbaridan Rossiyaning go‘yoki Ukrainadagi fuqarolik obyektiga bergan zarbasi haqida sharh so‘rashgan.
“Bilaman. Ba’zi voqealar yuz berishini ko‘rasiz”, deya javob berdi Tramp Vashington yaqinidagi Endryus harbiy bazasidan Texasga vayronkor suv toshqini oqibatlarini bartaraf etish jarayoni bilan tanishish uchun jo‘nashdan oldin.
AQSH ma’muriyati rahbari bu borada boshqa hech qanday izoh bermadi.
10-iyul kuni Tramp NBC telekanaliga bergan intervyusida dushanba kuni Rossiyaga oid muhim bayonot berishni rejalashtirayotganini ma’lum qildi. Amerika rahbari tafsilotlarni keltirmagan, biroq Ukrainadagi vaziyatni tartibga solish jarayoni qanday borayotganidan ko‘ngli to‘lmaganini yana bir bor ta’kidlagan.
Bundan avval Tramp Rossiyaga nisbatan “kichik syurpriz”ga ishora qilib, Vladimir Putinning harakatlaridan “mamnun emasligini” ta’kidlagan edi.
Shu bilan birga, AQSHning Ukrainadagi maxsus elchisi Kit Kellog 14-iyul kuni Kiyevga kelishini va u yerda bir hafta qolishini ma’lum qildi.
Shu fonda Reuters manbalarga tayanib xabar berishicha, AQSH prezidenti ikkinchi muddati boshlanganidan beri Ukrainaga Amerika zaxiralaridan birinchi qurol-yarog‘ turkumini yuborishni buyurgan. Tramp Kongressning ruxsatisiz qurol-yarog‘larni tezkor tarzda jo‘natish imkonini beruvchi Prezidentlik zaxiralaridan foydalanish vakolati (PDA) mexanizmini ishga tushirdi. Agentlik manbalariga ko‘ra, to‘plamning qiymati taxminan 300 million dollarni tashkil etishi mumkin. Unga, ehtimol, Patriot raketalari va GMLRS boshqariladigan snaryadlari kiritiladi.
Izoh (0)