Janubiy Afrika Respublikasida (JAR) noqulay ob-havo tufayli kamida 57 kishi halok bo‘ldi. Bu haqida Al Jazeera xabar bermoqda.
Telekanal ma’lumotlariga ko‘ra, g‘oyat sovuq havo oqimi mamlakatning ayrim hududlariga kuchli yomg‘ir va qor yog‘ishini olib kelgan. Buning natijasida mamlakat bo‘yicha ikkinchi yirik viloyat hisoblangan Sharqiy Keypda kuchli suv toshqini yuz bergan. Aynan shu tabiiy ofat qurbonlarga sabab bo‘ldi.
Mintaqa ma’muriyati rahbari Oskar Mabuyanening aytishicha, bedarak yo‘qolganlarni qidirish ishlari davom etayotgani sababli, rasmiylar halok bo‘lganlar soni yana ortishini kutmoqda. Jumladan, olti nafar yuqori sinf o‘quvchisi ham noqulay ob-havo qurboniga aylangan.
“11-iyun kuni tushga kelib Sharqiy Keyp viloyatida halok bo‘lganlar soni 49 nafarga yetdi. Eng ko‘p talafot ko‘rgan hudud OR Tambo munitsipal okrugi bo‘lib, qurbonlarning aksariyati shu yerda qayd etildi. Ular orasida ko‘prikdan daryoga qulab tushgan maktab avtobusidagi to‘rt nafar o‘quvchi ham bor. Yana to‘rt nafar o‘quvchini qidirish ishlari davom etmoqda, ular bedarak yo‘qolgan deb hisoblanmoqda”, dedi u matbuot anjumanida.
Mabuyanening aniqlik kiritishicha, odamlar o‘limining asosiy sabablari jala tufayli sodir bo‘lgan ko‘chkilar, shuningdek, yo‘llardagi qalin qor qatlami bo‘lgan. Mamlakatda qor ko‘chkilari sababli bir qator avtomobil yo‘llari yopilgan. Hozircha JARning janubiy va sharqiy mintaqalari ko‘proq zarar ko‘rgan.
Rasmiylar yuz minglab xonadonlarda elektr ta’minoti uzilgani, kamida 58 ta maktab va 20 ta shifoxona suv toshqinlaridan zarar ko‘rganini ma’lum qildi. Bundan tashqari, 500 ga yaqin odam uylari vayron bo‘lgani yoki qattiq shikastlangani sababli vaqtinchalik joylashtirish markazlariga ko‘chirildi.
“Men hech qachon bunday holatni ko‘rmaganman”, deya e’tirof etdi Mabuyane.
Ta’kidlanishicha, ob-havo bashoratchilari bir necha kun oldin mintaqaga halokatli yomg‘ir va qor xavf solayotgani haqida ogohlantirgan.
Ma’lumot uchun, sovuq havo oqimi JARga 9-iyun kuni kirib kelgan. Ayrim hududlarda tungi harorat noldan past ko‘rsatkichlargacha tushgan. Sinoptiklarning ogohlantirishicha, JARda boshlangan qish joriy o‘n yillikning eng qattiq qishlaridan biriga aylanishi mumkin.
Izoh (0)