Tabiat kuchlari odamlar ixtiyoridan tashqarida bo‘lgani uchun qadimgi odamlar turli ilohlar, ma’budlarni o‘ylab topishgan. Garchi taraqqiy etgan bugungi zamonimizda bunday qarashlar erish tuyulsa-da, tabiat irodasiga bo‘ysunmasdan ilojimiz yo‘q.
Xususan, oxirgi haftalardagi qaqshatqich sovuq butun davlat infrastrukturasiga salbiy ta’sir ko‘rsatmasdan qolmadi. Ammo bu hafta qahraton bir oz susaydi. Buni ayrim hududlarda elektr ko‘proq berilayotganidan yoki metan navbatlari yo‘qolganidan sezish mumkin. Dam olish kunlari esa Erondan kirib kelgan quruq va iliq havo mamlakatimiz janubini +22 darajagacha, boshqa hududlarini +12 darajagacha qizdirdi. Ammo bahor keldi deb o‘ylagan daraxtlarga barg yozib yuborishni maslahat bermaymiz, chunki gidrometeorologlar kelayotgan hafta havo yana sovushini va’da qilyapti. Demak, o‘quvchilarimizga palto-sharflarni hozircha taxlamaslikni, haydovchilarga ko‘proq yoqilg‘i quyib olishni va antifrizni to‘kmaslikni, uy isitish tizimini esa sozlab qo‘yishni, eng asosiysi, qishloq joydagilar yoqilg‘ini g‘amlab qo‘yishni maslahat beramiz.
* * *
Ko‘pchilikning esidan chiqayozgan koronavirus mavzusiga qaytamiz. Virusning yangi shtammi aniqlangandan beri shifokorlarning halovati yo‘qolgan. Nafaqat shifokorlar, balki davlatlar karantin choralarini yana kiritmoqda. O‘zbekiston ham bundan mustasno emas.
Respublika maxsus komissiyasining qarori bilan 2020-yil dekabridan 2021-yil 10 yanvargacha Buyuk Britaniya, Italiya, Daniya, Avstriya, Avstraliya, Niderlandiya va Janubiy Afrika Respublikasi davlatlari bilan xalqaro aviareyslar (kirish, chiqish va tranzit reyslar orqali respublikaga kirish) to‘xtatilgan edi. Bugungacha ushbu mamlakatlarda epidemiologik vaziyat murakkabligicha qolgani sababli 2021-yil 10-yanvariga qadar kiritilgan cheklov muddati 1-fevralgacha uzaytirildi.
* * *
O‘tgan hafta Jizzaxda Mustaqillik ko‘chasidagi olti qavatli uy xuddi qumdan qurilgan uycha kabi qulab tushgani videosi tarqalgan edi. Bu haftada jamoatchilikning diqqat-e’tibori shu qulagan uyga qaratildi. Xarobalar ostidan esa anchagina faktlar chiqa boshladi.
Ochilboy Ramatov boshchiligidagi hukumat komissiyasi bino qulashi sababini o‘rganadigan bo‘ldi. Ma’lum bo‘lishicha, uyni qo‘y naslchiligi bilan shug‘ullanuvchi fermer xo‘jaligi qurayotgan bo‘lgan. Qurilishning buyurtmachisi ham, pudratchisi ham uning egasi, ya’ni “Barakali Qorako‘l Chorvador” fermer xo‘jaligining o‘zidir. Uning rahbari esa qurilishga aloqasi yo‘q.
Buning ustiga, uning yonidagi olti qavatli inshootning ham poydevorlari cho‘kib xavfli holatda turibdi. Jizzax shahar bosh me’morining bergan ma’lumotiga ko‘ra, tadbirkor qulagan binoning orqasidagi inshootni o‘zboshimchalik bilan noqonuniy qurib olgan.
Qurilish vazirining o‘rinbosari Kozim To‘laganov “Ko‘rsatib o‘tilgan kamchiliklar berilgan taqdirda ham eng xavfli tomoni — qurilishda na usta, na ‘prorab’ bo‘lgan. O‘zi bilganicha ish olib borgan”, deb bu haqda bayonot berdi. Qurilish vaziri Botir Zokirov esa bu yerda korrupsion sxema bo‘lgani haqida gapirdi.
Voqeaga Shavkat Mirziyoyev ham e’tibor qaratib, “Jizzax viloyati hokimining qurilish bo‘yicha o‘rinbosari bizning siyosatimizga xiyonat qilgan. Buni hamma bilishi lozim. Uning butun to‘dasiga qonuniy jazo ko‘rish kerak. Sholi kurmaksiz bo‘lmaganidek, baribir eski zamonni qo‘msagan noinsoflar ham bor. Ular erkinlik, ochiqlik siyosatini tushunmaydi”, — deb aytdi.
* * *
Bu hafta ta’lim sohasidagi yangiliklarga boy bo‘ldi.
Toshkent shahrida Sankt-Peterburg davlat universiteti Federal davlat budjeti oliy ta’lim muassasasi filiali tashkil etiladi. Filialda o‘qish bakalavriat va magistratura mutaxassisliklari bo‘yicha quyidagi yo‘nalishlarda tashkil etiladi: filologiya (Sharq tillari bo‘yicha); mamlakatshunoslik va xorijiy mamlakatlar iqtisodiyoti (Sharq mamlakatlari bo‘yicha); biotibbiyot (kimyo, biologiya, fizika, psixologiya va boshqalar).
Shavkat Mirziyoyev 15-yanvar kuni Toshkent shahri va Yunusobod tumani faollari bilan uchrashdi. Uchrashuvda JIDU talabasi so‘z olib, bo‘lajak diplomatlar elchixonalarda amaliyot o‘tashini taklif qildi. Prezident 17 yoshli talaba qizning taklifini qo‘llab-quvvatlab, “...bu bo‘yicha tegishli qaror ham chiqaramiz. Ammo sizga xohlagan vaqtingizda Amerika elchixonasiga borib, bir oymi yoki bir yilmi, istaganingizcha ishlab kelish imkoniyatini beraman”, dedi.
Xuddi shu yig‘inda prezident yana bir yangilikning uchini chiqardi. Prezident universitetlari tashkil etiladi va unda Oksford ta’limi joriy qilinadi. Uning hamma o‘qituvchilari chet eldan bo‘ladi. “...Nega? Chunki bolalarimiz chet elga ketib, ularning 50 foizi qaytib kelmayapti. ‘Eng katta aql’ ketyapti. Ularga u yerdagi sharoit yoqadi, oylik katta. Ammo endi men shu sharoitlarni yaratib, ularni o‘zimizda o‘qitmoqchiman. Ketmasin bolalarimiz...”, dedi Shavkat Mirziyoyev.
* * *
Darvoqe, ta’lim sohasidagi eng katta yangilikni yozmabmiz – Abduqodir Toshqulov Oliy va o‘rta maxsus ta’lim vaziri bo‘ldi. U bungacha TerDU rektori edi. Avvalgi vazir Inomjon Majidov esa O‘zbekiston Milliy universitetiga rektor etib tayinlandi.
Endi hafta tayinlovlariga batafsilroq to‘xtalamiz. Shunday qilib, Abduqodir Toshqulov oliy ta’lim vaziri, Sherzod Hidoyatov kommunal xizmat ko‘rsatish vaziri lavozimiga ma’qullandi. Saidkamol Xodjayev boshqa ishga o‘tgani munosabati bilan qishloq xo‘jaligi vaziri o‘rinbosari lavozimidan ketdi.
Yunusobod tumani hokimi lavozimida ishlab kelgan Rahmonbek Usmonov O‘zbekiston Respublikasi transport vazirining o‘rinbosari lavozimiga tayinlandi. Usmonov oldin Toshkent shahar hokimi ham bo‘lgan.
Davlat soliq qo‘mitasi raisining birinchi o‘rinbosari — Kadastr agentligi direktori Xalilillo To‘raxo‘jayev Oliy sud raisining fuqarolik ishlari bo‘yicha o‘rinbosari lavozimiga o‘tdi. U bunga qadar Davlat soliq qo‘mitasi raisining birinchi o‘rinbosari — Kadastr agentligi direktori, ungacha esa Davlat xizmatlari agentligi direktori lavozimlarida faoliyat yuritgan. U bunga qadar Davlat soliq qo‘mitasi raisining birinchi o‘rinbosari — Kadastr agentligi direktori, ungacha esa Davlat xizmatlari agentligi direktori lavozimlarida faoliyat yuritgan, deb yozmoqda “Davletov.uz”.
Har qanday ob-havoda “Daryo.uz” sizga eng qaynoq yangiliklarni taqdim etadi. Biz bilan qoling.
Izoh (0)