Transport vazirligi Afg‘onistondagi Salang dovoni vaqtincha yopilishini bildirib, yuk tashuvlarini amalga oshiruvchi haydovchilarga ogohlantirish bilan chiqdi.
Afg‘oniston tomonining ma’lumotiga ko‘ra, Salang dovonida navbatdagi ta’mirlash jarayoni olib borilishi natijasida dovon orqali katta hajmli yuk transport vositalarining harakatlanishi 2025-yil 10-iyundan boshlab vaqtincha to‘xtatiladi.
Mazkur yo‘nalish orqali xalqaro yuk tashuvlarini amalga oshirishni rejalashtirgan tashuvchilardan ushbu jihatni inobatga olishlari so‘raldi. Transport vazirligi Pokiston va Pokiston portlariga yuk tashuvlarini boshqa muqobil transport yo‘nalishlari orqali amalga oshirishni tavsiya etdi.
Salang dovoni Afg‘onistonning shimoliy va janubiy qismlarini bog‘lovchi eng muhim avtomobil yo‘li bo‘lib xizmat qiladi. U orqali Kobul (poytaxt) va shimoldagi shaharlar (Mozori Sharif, Qunduz, Shibirg‘on) o‘zaro bog‘lanadi. Salang tunnel tufayli Hindukush tog‘lari osha qatnov yengillashgan va butun yil davomida harakat mumkin bo‘lgan.
O‘zbekiston uchun Salang dovonining ahamiyati
1. Savdo va tranzit yo‘li sifatida
Salang dovoni orqali o‘tuvchi yo‘l Afg‘onistonni O‘zbekiston bilan bog‘lovchi savdo yo‘li sifatida xizmat qiladi. Ayniqsa, Termiz—Mozori Sharif—Kobul—Pokiston yo‘nalishi bo‘yicha yuklar Salang dovonidan o‘tadi. Bu yo‘l orqali yuklar Pokiston portlariga (Karachi, Gvadar) yetkazilishi mumkin, bu esa O‘zbekiston uchun dengizga chiqishning muqobil yo‘lidir.
2. Transafg‘on transport loyihalari uchun asos
O‘zbekiston Afg‘oniston orqali temiryo‘l va avtomobil yo‘llarini rivojlantirishga katta qiziqish bildirmoqda. Termiz—Mozori Sharif—Kobul—Peshovar temiryo‘l loyihasi amalga oshirilsa, bu yo‘nalishda Salang dovonining ahamiyati yanada oshadi. Bu loyiha O‘zbekistonning Janubiy Osiyo bilan to‘g‘ridan-to‘g‘ri savdo qilish imkonini beradi.
3. Mintaqaviy barqarorlik uchun kalit hudud
Afg‘onistondagi vaziyat O‘zbekiston xavfsizligi bilan chambarchas bog‘liq. Salang dovoni orqali o‘tuvchi yo‘llar xavfsizligi, mintaqada barqarorlikni saqlashda strategik omildir. Shuning uchun O‘zbekiston Afg‘onistonda tinchlikni qo‘llab-quvvatlaydi va logistika infratuzilmasining yaxshilanishiga hissa qo‘shmoqda.
Transport vazirligi O‘zbekiston va Afg‘oniston Hayraton—Mozori Sharif temiryo‘lidan foydalanish bo‘yicha shartnomani uzaytirganini ma’lum qilgan edi.
Hayraton—Mozori Sharif temiryo‘lidan foydalanish
Afg‘onistonning Mozori Sharif shahrini O‘zbekiston chegarasi bilan bog‘lovchi 75 kilometrlik temiryo‘l 2010-yili ochilgan. Temiryo‘lni qurish bo‘yicha Afg‘oniston hukumati tenderida “O‘zbekiston temiryo‘llari” yutib chiqqan. Loyiha Osiyo taraqqiyot bankining 165 million dollar hajmidagi granti hisobidan amalga oshirilgan.
Uni boshqarish va texnik xizmat ko‘rsatish ishlarini 2011-yilning dekabridan beri “O‘zbekiston temiryo‘llari” aksiyadorlik jamiyati sho‘ba korxonasi Sogdiana trans amalga oshirib kelayotgan edi.
2023-yil fevralida 12-fevral kuni Afg‘oniston temiryo‘l boshqarmasi va “Sogdiana trans” ShK o‘rtasida Hayraton—Mozori Sharif temiryo‘lida ekspluatatsiya ishlarini davom ettirish to‘g‘risida yangi kelishuv imzolangandi. Unga ko‘ra, Sogdiana trans 2 yil davomida o‘z faoliyatini davom ettirishi belgilangandi.
Izoh (0)