Keniyada Nayrobidagi politsiya hibsxonasida 31 yoshli bloger Albert Omondi Ojuangning halok bo‘lishi ortidan ommaviy norozilik namoyishlari avj oldi. Bu haqda BBC xabar bermoqda.
Erkak yuqori lavozimli politsiya xodimini tanqid qilgani uchun qo‘lga olingan. U o‘zining tug‘ilgan shahri Xoma-Beyda hibsga olinib, mahalliy tergov o‘rniga poytaxtga olib ketilgan va u yerda og‘ir bosh jarohatlaridan vafot etgan. Biroq ekspertiza xulosalariga ko‘ra, blogerning boshiga zarba yetkazilgan va uning o‘limi, ehtimol, hujum oqibatida yuz bergan.
Politsiyaning rasmiy bayonotiga ko‘ra, Ojuang o‘z boshini kamera devoriga urib, o‘ziga jarohat yetkazgan. Biroq jamoatchilik bu izohga ishonmaydi va uni Janubiy Afrikadagi aparteid davridagi usullarga o‘xshatmoqda.
Namoyishlar 9-iyun kuni Nayrobida boshlanib, marhumning jasadi saqlanayotgan morg yonida davom etgan.
Inson huquqlari tashkilotlari sodir bo‘lgan voqeani qattiq qoraladi va mustaqil tergov o‘tkazilishini talab qilmoqda.
“Sud tizimi qatl quroli bo‘lmasligi kerak. Jazosizlikka chek qo‘yish lozim”, dedi Xalqaro yuridik komissiyaning Keniyadagi bo‘limi rahbari Protas Saende.
Blogerning halok bo‘lishi 2023-yilda soliqlar oshirilishiga qarshi norozilik namoyishlaridan so‘ng kuchaygan politsiya shafqatsizligi ayblovlarining navbatdagi ko‘rinishi bo‘ldi. O‘shanda, huquq himoyachilari ma’lumotlariga ko‘ra, kamida 39 kishi halok bo‘lgan, yuzlab odamlar yaralangan, ko‘pchilik bedarak yo‘qolgan.
Izoh (0)