AQSH prezidenti Donald Tramp Kaliforniyadagi tartibsizliklar fonida shtat gubernatori Gevin Nyusomni hibsga olishni qo‘llab-quvvatlashini bildirdi. Bu haqda Reuters xabar bermoqda.
Agentlikning ma’lum qilishicha, ilgari Tramp ma’muriyatidagi “chegara qiroli” (chegara xavfsizligi bo‘yicha maslahatchi) Tom Xoman shtatdagi immigratsiya xizmatlari ishiga to‘sqinlik qiluvchi har qanday shaxsni, jumladan, Nyusom va Los-Anjeles meri Karen Bassni ham hibsga olish bilan tahdid qilgan. Kaliforniya gubernatori bunga javoban Xomanga ochiqchasiga qarshi chiqib, o‘zini hibsga olishni taklif etgan.
“Agar men Tom Xoman bo‘lganimda, uni hibsga olgan bo‘lardim. Menimcha, bu ajoyib g‘oya. Gevin e’tiborni o‘ziga tortishni yaxshi ko‘radi... U o‘z ishini barbod qildi. U menga yoqadi, lekin u o‘ta layoqatsiz va buni hamma biladi”, dedi Tramp jurnalistlarga.
AQSH prezidentining so‘zlariga ko‘ra, Los-Anjelesdagi tartibsizliklarni qamoqqa olinishi lozim bo‘lgan professional fitnachilar va isyonchilar uyushtirgan.
“Ular yomon odamlar”, deya qo‘shimcha qildi u.
Tramp isyon to‘g‘risidagi qonunni qo‘llash imkoniyatini ko‘rib chiqayotgani yoki yo‘qligiga javob berishdan bosh tortgan.
Avvalroq Kaliforniya gubernatori AQSH Milliy gvardiyasining Los-Anjelesga joylashtirilishi sababli Trampga qarshi sud da’vosi qo‘zg‘atishini ma’lum qilgandi. Uning aytishicha, prezidentning bunday qarorlari shtatlar gubernatorlari bilan kelishilishi shart, biroq Tramp bunday qilmagan.
Tartibsizliklar 7-iyun kuni AQSH immigratsiya va bojxona nazorati xizmati (ICE) tomonidan Los-Anjeles markazida noqonuniy muhojirlarni aniqlash bo‘yicha ommaviy operatsiya o‘tkazilgan reyddan so‘ng boshlangan. Namoyishchilar bilan to‘qnashuvlar shtatning federal moliyalashtirishi qisqartirilishi mumkinligi haqidagi xabarlar ortidan yuz berdi. Ertasi kuni Oq uy shaharga 2 ming nafar milliy gvardiya askari kiritilganini e’lon qildi.
Los-Anjeles okrugi ma’murlari milliy gvardiyadan yordam so‘ramaganini va uni kiritish qarori mahalliy hokimiyat bilan maslahatlashmasdan qabul qilinganini ta’kidladi. Bu Oq uy va shtat rahbariyati o‘rtasidagi oshkora kelishmovchiliklarga sabab bo‘ldi.
Izoh (0)