Apple 2025-yilgi an’anaviy WWDC (Worldwide Developers Conference) tadbirida o‘zining yangi avlod operatsion tizimlarini tantanali tarzda taqdim etdi. Bu safar kompaniya barcha platformalar uchun yagona raqamlashtirish tizimi va zamonaviy dizayn yondashuvini joriy qilib, texnologiyalar olamida muhim burilish yasadi.
Taqdimot hazilomuz sahna bilan boshlandi: Apple’ning dasturiy ta’minot ishlab chiqish bo‘yicha vitse-prezidenti Kreyg Federigi kompaniya shtab-kvartirasi ichida sportkar haydab yurdi. Bu Bred Pitt bosh rolni ijro etgan yangi “Formula-1” filmi reklamasi bo‘lib chiqdi. Film Apple TV+ platformasida namoyish etiladi.
iOS 26
Apple yangilanishlar raqamini o‘zgartirishini e’lon qildi. Endi har bir yangi versiya yil bilan belgilanadi: masalan, iOS 19 o‘rniga to‘g‘ridan-to‘g‘ri iOS 26. Shu tizim boshqa platformalarda ham qo‘llaniladi: iPadOS 26, macOS 26, watchOS 26, tvOS 26 va visionOS 26 kabi.
Liquid Glass
Taqdimotda Liquid Glass nomli yagona vizual uslub taqdim etildi, u iOS’dan macOS’gacha bo‘lgan barcha tizimlarda joriy qilinadi. Dasturchilar Liquid Glass’ni “kompaniya tarixidagi eng katta interfeys yangilanishi” deb atamoqda. Yangi dizayn yangilangan ilova belgilari (ikonkalar), va ovoz/yoritish sozlamalari bilan ajralib turadi.
Qurilmalarning doimiy ilovalari ham redizayn qilindi. Masalan, iPhone’dagi kamera menyusi soddalashtirildi va faqat video yozish yoki suratga tushirish funksiyasi qoldirildi. Kamera sozlamalari ham yangilandi: endi foydalanuvchi telefonni aylantirganda oddiy 2D rasm harakatlanayotgandek ko‘rinadi.
Apple CarPlay Ultra
Apple CarPlay’ning yangi, Ultra deb nomlangan versiyasi taqdim etildi. U kengaytirilgan funksiyalarga ega bo‘lib, hozircha Aston Martin avtomobillarida mavjud. Biroq kompaniya bu imkoniyat tez orada boshqa mashinalarga ham yetib borishini ma’lum qildi.
Apple Intelligence
Apple Intelligence (AI) imkoniyatlari yanada kengaytirildi. Endi u watchOS tizimiga ham integratsiya qilindi. Sun’iy intellektga asoslangan virtual trener foydalanuvchining jismoniy faolligi va sog‘lig‘i asosida maslahatlar beradi. Shuningdek, atrofdagi shovqinlarni aniqlab, eslatma va xabarnomalar ovozini avtomatik ravishda moslashtiradi.
Shuningdek, Apple Visual Intelligence nomli yangilangan AI funksiyasini ham namoyish etdi. Bu tizim skrinshotdagi obyektlarni aniqlab, ularga o‘xshash bo‘lganlarini internet orqali izlab topishga qodir.
Taqdimotda ilg‘or Call Screening funksiyasi ham ko‘rsatildi. U avtomatik tarzda qo‘ng‘iroqqa javob beradi. Xabarlar tizimida ham shunga o‘xshash funksiya mavjud: spam SMS’lar avtomatik ravishda ajratilib, alohida papkaga yuboriladi.
macOS
Yangi macOS 26, ya’ni Tahoe versiyasi yagona interfeysga ega bo‘ldi va qidiruv tizimi imkoniyatlari kengaytirildi. Shuningdek, qo‘shimcha personalizatsiya imkoniyatlari qo‘shildi.
Genmoji
Turli emojilar ishqibozlari uchun yangilangan Genmoji funksiyasi taqdim etildi. Uning yordamida odamlarning yuz ifodalarini tanlab, ularga mos emoji yaratish mumkin.
Izoh (0)