АҚШ президенти Дональд Трамп Калифорниядаги тартибсизликлар фонида штат губернатори Гевин Ньюсомни ҳибсга олишни қўллаб-қувватлашини билдирди. Бу ҳақда Reuters хабар бермоқда.
Агентликнинг маълум қилишича, илгари Трамп маъмуриятидаги “чегара қироли” (чегара хавфсизлиги бўйича маслаҳатчи) Том Хоман штатдаги иммиграция хизматлари ишига тўсқинлик қилувчи ҳар қандай шахсни, жумладан, Ньюсом ва Лос-Анжелес мери Карен Бассни ҳам ҳибсга олиш билан таҳдид қилган. Калифорния губернатори бунга жавобан Хоманга очиқчасига қарши чиқиб, ўзини ҳибсга олишни таклиф этган.
“Агар мен Том Хоман бўлганимда, уни ҳибсга олган бўлардим. Менимча, бу ажойиб ғоя. Гевин эътиборни ўзига тортишни яхши кўради... У ўз ишини барбод қилди. У менга ёқади, лекин у ўта лаёқатсиз ва буни ҳамма билади”, деди Трамп журналистларга.
АҚШ президентининг сўзларига кўра, Лос-Анжелесдаги тартибсизликларни қамоққа олиниши лозим бўлган профессионал фитначилар ва исёнчилар уюштирган.
“Улар ёмон одамлар”, дея қўшимча қилди у.
Трамп исён тўғрисидаги қонунни қўллаш имкониятини кўриб чиқаётгани ёки йўқлигига жавоб беришдан бош тортган.
Аввалроқ Калифорния губернатори АҚШ Миллий гвардиясининг Лос-Анжелесга жойлаштирилиши сабабли Трампга қарши суд даъвоси қўзғатишини маълум қилганди. Унинг айтишича, президентнинг бундай қарорлари штатлар губернаторлари билан келишилиши шарт, бироқ Трамп бундай қилмаган.
Тартибсизликлар 7 июнь куни АҚШ иммиграция ва божхона назорати хизмати (ICE) томонидан Лос-Анжелес марказида ноқонуний муҳожирларни аниқлаш бўйича оммавий операция ўтказилган рейддан сўнг бошланган. Намойишчилар билан тўқнашувлар штатнинг федерал молиялаштириши қисқартирилиши мумкинлиги ҳақидаги хабарлар ортидан юз берди. Эртаси куни Оқ уй шаҳарга 2 минг нафар миллий гвардия аскари киритилганини эълон қилди.
Лос-Анжелес округи маъмурлари миллий гвардиядан ёрдам сўрамаганини ва уни киритиш қарори маҳаллий ҳокимият билан маслаҳатлашмасдан қабул қилинганини таъкидлади. Бу Оқ уй ва штат раҳбарияти ўртасидаги ошкора келишмовчиликларга сабаб бўлди.
Изоҳ (0)