Oq uy Bayden ma’muriyati bilan erishilgan kelishuvga muvofiq Ukrainaga berilishi kerak bo‘lgan 20 ming raketani Yaqin Sharqqa o‘tkazgan. Bu haqda ukrainaliklar yetakchisi Vladimir Zelenskiy ABC News telekanaliga bergan intervyusida ma’lum qildi. Uning aytishicha, raketalar Shahed kamikadze dronlarini urib tushirish uchun maxsus ishlab chiqarilgan edi.
Zelenskiy, shunga qaramay, raketalar qimmat bo‘lmaganini qo‘shimcha qilib, Rossiyaning havo hujumlari uning mamlakati uchun jiddiy xavf tug‘dirayotganini ta’kidladi.
“Biz bu loyihaga tayangan edik. Oramizdagi kelishuv 20 000 raketani nazarda tutgan. Shahed’ga qarshi raketalar. Ular qimmat emas edi, lekin — maxsus texnologiya. Shuning uchun biz aynan shu 20 000 raketaga umid qilgan edik. Bugun ertalab mudofaa vazirim menga aytdiki, AQSH bu raketalarni Yaqin Sharqqa o‘tkazib yuborgan”, dedi Zelenskiy.
Rossiya 2022-yilning ikkinchi yarmidan boshlab Ukraina infratuzilma obyektlariga Shahed tipidagi kamikadze dronlardan intensiv zarba bera boshladi. Mazkur turdagi uchuvchisiz uchish qurilmalari arzon bo‘lib, bu ularni ko‘p sonda qo‘llash imkonini beradi. Biroq ular past uchgani bois, qisqa masofali zenit raketalar, hatto standart zenit qurollar yordamida urib tushirish mumkin.
Keng ko‘lamli urushning to‘rtinchi yiliga kelib, Rossiya bu turdagi dronlar ishlab chiqarishni keskin oshirdi. Ukraina manbalariga ko‘ra, ruslar birgina 6-iyun tunida 407 ta uchuvchisiz uchish qurilmasi bilan zarba bergan.
Ukrainaliklar ularni aniqlash va zararsizlantirish uchun turli yechimlarga qo‘l urmoqda. Dron ovlaydigan mobil brigadalar, Ikkinchi jahon urushi samolyotlari shular jumlasidan.
Izoh (0)