Britaniya temir yo‘l, dengiz va transport kasaba uyushmasi (RMT) a’zolari Birlashgan Qirollik hukumatidan Ukrainaga harbiy yordam ko‘rsatishni to‘xtatishni talab qildi. Bu haqda kasaba uyushmasining Paddington (London) bo‘limi kiritgan tinchlik tashabbusida aytilgan, deya xabar bermoqda The Daily Telegraph gazetasi.
Ma’lum qilinishicha, leyboristlar hukumati vazirlarini “diplomatik, muzokaralarga asoslangan, uzoq muddatli tinchlik kelishuviga erishish uchun harakat qilish majburiyatini olishga” undovchi tashabbus o‘tgan hafta Manchesterda bo‘lib o‘tgan RMT yillik yig‘ilishida ma’qullangan.
“2024-yilgi umumiy saylovlarda konservativ hukumat Leyboristlar partiyasidan mag‘lubiyatga uchraganiga qaramay, Buyuk Britaniya xalqaro ishlarda jangovar rolini davom ettirmoqda. U Britaniyada ishlab chiqarilgan qurollar, harbiy yordam, kreditlar va davlat mablag‘laridan milliardlab funt sterlingni yetkazib berib, Rossiyaning Ukrainadagi harbiy mag‘lubiyatiga erishishga besamar urinmoqda”, deyiladi Murojaatda.
Uyushma a’zolari “o‘tgan yili yadroviy halokatga olib kelishi mumkin bo‘lgan cheksiz va kuchayib borayotgan urushni moliyalashtirish” uchun “turmush darajasini pasaytirish siyosatini” rad etganlarini bildirishgan.
Uyushma matbuot kotibining tushuntirishicha, tashabbus butun dunyo bo‘ylab mojaro hududlarida – “G‘azo sektori, Yaman va Eronda, shuningdek, Ukrainada” vaziyatni yumshatishga chaqirgan. U yana qo‘shimcha qilishicha, kasaba uyushmasi Moskvaning Kiyevga nisbatan harakatlarini qo‘llab-quvvatlamasa-da, mojaroni “tinch yo‘l bilan hal qilish uchun sharoit yaratish nuqtai nazaridan bir tomonni ikkinchi tomonga qarshi qurollantirishni maqsadga muvofiq emas” deb hisoblaydi.
RMT bosh kotibi Eddi Dempsi “kasaba uyushmasi pozitsiyasini to‘liq qo‘llab-quvvatlashini” ta’kidlagan.
Rasmiy ma’lumotlarga ko‘ra, Buyuk Britaniyaning Ukrainani 2025-yilda harbiy qo‘llab-quvvatlash paketi rekord darajadagi 4,5 milliard funt sterlingni (6,2 milliard dollar) tashkil etishi kutilmoqda. Rossiyaning Buyuk Britaniyadagi elchixonasi doimiy ravishda Rossiya Buyuk Britaniyaga tahdid solmasligini ta’kidlab, Londonni o‘z harbiy byudjetini oshirish uchun Rossiyaga qarshi kayfiyatni kuchaytirishdan voz kechishga chaqirmoqda.
Izoh (0)