Buyuk Britaniya hukumati Panamadan kelgan kemadan 2,4 tonna kokainni musodara qildi va bu operatsiyani so‘nggi yillardagi eng yirik narkotik musodaralaridan biri deb atadi. Bu haqda SkyNews xabar berdi.
Giyohvand moddalar London Geytvey portida kema konteynerlari ostidan aniqlangan. Razvedka ma’lumotlariga asoslangan operatsiya natijasida 37 ta yirik konteyner siljitilib, qiymati 96 million funt sterling (132 million dollar) bo‘lgan kokain topilgan.
Britaniya Ichki ishlar vazirligi bu mamlakatda kokainni musodara qilish bo‘yicha oltinchi yirik holat ekanini ta’kidlagan. Jinoyatchilikka qarshi kurash milliy agentligiga ko‘ra, Britaniya Yevropadagi eng yirik kokain bozorlaridan biri hisoblanadi.
Bu musodara chegarani himoya qiluvchi dengiz kuchlarining jinoyatchi guruhlardan bir qadam oldinda ekanini yana bir bor ko‘rsatmoqda. Jinoyatchilarga ochiq xabarimiz bor: biz bunday operatsiyalarni razvedka ma’lumotlari va xalqaro huquq-tartibot idoralari bilan hamkorlikda tobora kuchaytirayapmiz. Sizning noqonuniy faoliyatingizni to‘xtatamiz va yo‘q qilamiz, degan Britaniya Chegara xizmati dengiz bo‘yicha direktori Charli Istou.
Hukumat ma’lumotlariga ko‘ra, 2022—2023-yillarda Angliya va Uelsda kokain bilan bog‘liq o‘limlar soni 31 foizga oshgan.
Izoh (0)