Buyuk Britaniya AQSHdan yadro qurolini tashuvchi 12 ta F-35A samolyotini sotib olib, NATO yadroviy missiyasiga qo‘shilishni rejalashtirdi. Bu haqda Britaniya bosh vaziri Kir Starmerga tayanib CNN xabar berdi.
Vazir 25-iyun kuni bo‘lib o‘tayotgan NATO sammiti chog‘ida alyansni qo‘llab-quvvatlash uchun ko‘proq harakat qilishga chaqirmoqda.
“Buyuk Britaniya, shubhasiz, NATOga sodiq qoladi. Alyansning Britaniyani xavfsiz saqlashga qo‘shgan hissasi ham katta. Ammo hammamiz kelajak avlodlar uchun Yevro-Atlantika hududini himoya qilishga harakat qilishimiz kerak”, dedi Starmer.
Bu yangilik AQSH prezidenti Donald Trampning NATO davlatlari mudofaaga yetarlicha mablag‘ sarflamayotgani haqidagi takroriy tanqidlaridan keyin e’lon qilingan.
F-35A, asosan, AQSHda Lockheed Martin tomonidan ishlab chiqariladigan beshinchi avlod samolyoti hisoblanadi. U sayyoradagi eng ilg‘or va qimmat qiruvchi samolyotlardan biri.
Yadro qurolini tashish qobiliyatiga ega bo‘lgan samolyotlarni sotib olish to‘g‘risidagi qaror Britaniyaning yadroviy pozitsiyasini mustahkamlaydi. Mamlakat endi NATOning ikki tomonlama yadroviy missiyasiga ham qo‘shiladi. Buyuk Britaniyada F35 dasturi 20 ming ish o‘rni yaratishi kutilmoqda.
Izoh (0)