Gollivud yulduzlari faqat aktyorlik mahorati yoki go‘zalligi bilan emas, balki nasl-nasabi jihatidan ham ajralib turadi. Ba’zilarining ildizi hatto qirollik sulolalariga, zodagon ajdodlarga borib taqaladi. Ushbu maqolada biz asl kelib chiqishi qirollarga, knyazlarga yoki baronlarga borib taqaladigan mashhur aktyor va aktrisalarga nazar tashlaymiz.
Reyf Fayns
2019-yilda Charlz hali Uels shahzodasi bo‘lgan paytda, u “O‘lish vaqti emas” nomli so‘nggi Jeyms Bond filmi suratga olinayotgan joyga bordi. U yerda M rolini ijro etayotgan aktyor Reyf Fayns bilan uchrashdi. Fayns Charlzni “samimiy” va “kelishgan” inson deb atab, uning tashrifi suratga olish jarayoniga o‘zgacha muhit baxsh etganini aytdi.
Reyf Fayns Buyuk Britaniya qirolining sakkizinchi avlodi hisoblangan uzoq qarindoshidir. Ularning ikkalasi ham Shotlandiya qiroli Yakov II ning avlodlaridan hisoblanadi. Fayns familiyasining kelib chiqishi esa normanlarga borib taqaladi va qadimiy baronlik unvoni bilan bog‘liq.
Tilda Suinton
Tilda Suinton — “Oskar” mukofoti sovrindori va qadimiy Shotlandiya Suinton klanining vakili hisoblanadi. Uning nasl tarixi uzoq o‘tgan zamonlarga borib taqaladi. Bundan tashqari, Tilda Robert I ning XIV asrda Shotlandiyani ingliz bosqinchilaridan ozod qilgan Bryuslar sulolasi qirolining avlodidir.
Maktabda Tilda Suintonning sinfdoshi malika Diana bo‘lgan. Bir paytlar Tildaning ota-onasi uni gertsogga turmushga berishni xohlagan, ammo qiz o‘zining sharafli nasabiga qaramay, aktyorlik yo‘lini tanlagan.
Kit Xarington
“Taxtlar o‘yini” serialida temir taxtning vorisi bo‘lishdan oldin, Kit Xarrington haqiqiy hayotda ham yuqori tabaqadan edi. Uning to‘liq ismi Kristofer Keytsbi Xarrington bo‘lib, nasabi Britaniya tarixidagi ikki mashhur oilaga borib taqaladi. U otasi tomondan Shotlandiya qirol Karl II Styuartning avlodidir. Qiziq tomoni, aktyorning xotini Ro‘z Lesli — serialda Jon Snouning sevgilisi Igritt rolini o‘ynagan. U ham Karl II ning avlodlaridan.
Keytsbi familiyasi ham bejiz emas. 1605-yilda mashhur Porox fitnasini uyushtirgan Robert Keytsbi, Kit Xarringtonning onasi tomonidan qarindoshi bo‘ladi. Qiziq jihati, 2017-yilda Kit aynan o‘sha qarindoshining rolini “Porox” mini-serialida ijro etgan.
Anjelina Joli
Gollivud yulduzining asl kelib chiqishi Fransiya tarixining uzoq o‘tmishiga borib taqaladi. Uning onasi tomondan nasabi Fransiya qiroli Filip II Avgustga borib taqaladi. U 1180-yildan 1223-yilgacha hukmronlik qilgan. Natijada Anjelina Joli qirolicha Yelizaveta II ning 26-avlod qarindoshi hisoblanadi.
Sharafli kelib chiqish Anjelina Jolinining sobiq turmushi o‘rtog‘i Bred Pittda ham kuzatiladi. Aktyor XII asrda yashagan Genrix II Plantejenetning avlodidir. Joli va Pittning ittifoqi nafaqat yulduzlar birligi, balki haqiqiy “qirollik” sulolasi hisoblanadi.
Robert Pattinson
Robert Pattinson ekran oldida zodagon qahramonlar obrazlariga oson kiradi — sirli vampir Edvard Kullen yoki yangi Betmen kabi rollarda o‘zini bemalol ko‘rsata oladi. Bu uning tug‘ma jozibasi sabab bo‘lishi mumkin. Yoki ehtimol, bu nasl-nasab bilan bog‘liqdir. Tadqiqotlarga ko‘ra, u shahzodalar Uilyam va Garri bilan uzoq qarindosh.
Biroq undan ham qiziqrog‘i — Pattinsonning shajarasida yana bir mashhur shaxs bor. Britaniya qirollik oilasi orqali u Vlad III Tsepes — tarixda Vlad Drakula nomi bilan tanilgan ruminiyalik knyazning avlodidir. Aynan shu shaxs asosida yozuvchi Brem Stoker mashhur “Drakula” obrazini yaratgan. Ajablanarlisi shundaki, aynan vampir roli — ya’ni “Oqshom” filmidagi Edvard Kullen Pattinsonni butun dunyoga mashhur qilgan.
Xilari Daff
Gollivudning “qirollik” yulduzi unvoniga Xilari Daff munosib deb topilgan. “Zolushka hikoyalari” filmi va “Lizzi Maguayr” seriali orqali tanilgan amerikalik aktrisa va qo‘shiqchi Vindzor sulolasi bilan qarindosh hisoblanadi. Xilari Daffning nasabi Angliya qiroli Edvard III ga borib taqaladi. Qirolning chevarasi Aleksandr Spotsvud Britaniya armiyasi zobiti bo‘lgan va Virjiniyaga ko‘chib ketgan. U AQSHdagi ilk mustamlaka gubernatorlaridan biri bo‘lgan.
Shuningdek, Daff Tilda Suinton singari boshqa mashhur tarixiy shaxslar bilan ham qarindoshlikka ega.
Izoh (0)