Surxondaryo viloyati “Surxon” davlat qo‘riqxonasida ikki hayvonni ovlaganlar tabiatga 4,5 mlrd so‘m zarar yetkazdi. Bu haqda viloyat Ekologiya boshqarmasi xabar berdi.
Ma’lum qilinishicha, 5-iyul kuni “Surxon” davlat qo‘riqxonasining “Xatak” bo‘limi, “Oltikunlik” massivida o‘tkazilgan reyd chog‘ida noqonuniy ov holati aniqlanib, Qizil kitobga kiritilgan ikki bosh burama shoxli echki (morxo‘r) ovlangani ma’lum bo‘ldi.
Reyd davomida qo‘riqxona hududida qurol bilan harakatlanayotgan uch nafar fuqaro shubha uyg‘otadi, ularning harakati kuzatiladi. Ular toshloq va tik qiyaliklarda harakatlanayotgan bo‘lishiga qaramay, masofadan binokl va mobil vositalar yordamida nazoratga olinib, harakati hujjatlashtirilib boriladi.
Nazorat davomida huquqbuzarlar morxo‘r ovlab, so‘yayotgan vaqtda qo‘lga olingan. Hayvon qoldiqlari Termiz davlat universiteti huzuridagi sud-zoologik ekspertizaga yo‘naltirilib, ularning bir va uch yosh atrofidagi erkak va urg‘ochi morxo‘rlar ekani tasdiqlandi.
Mazkur holat Sherobod tumani “Katta hayot” mahallasida yashovchi X.Sh., Sh.J. hamda “Vandob” mahallasida yashovchi V.M. tomonidan sodir etilgani aniqlangan.
Burama shoxli echki (Capra falconeri) — xalqaro miqyosda himoyalanadigan noyob hayvon turi hisoblanadi. Uni ovlash O‘zbekiston Jinoyat kodeksiga asosan javobgarlikka sabab bo‘ladi.
Prezidentning 2023-yil 31-maydagi qaroriga muvofiq, Qizil kitobga kiritilgan hayvonlarni noqonuniy ovlash holatlarida jarimalar 10 baravarga oshiriladi. Natijada mazkur holatda davlatga yetkazilgan zarar 4,5 milliard so‘m deb hisoblangan.
Hozirda holat yuzasidan hujjatlar tegishli tartibda huquqni muhofaza qiluvchi organlarga topshirilgan va tergovgacha bo‘lgan surishtiruv ishlari olib borilmoqda.
Ma’lumot uchun, “Surxon” davlat qo‘riqxonasi 1986-yilda tashkil etilgan bo‘lib, muhofaza etiladigan hudud hisoblanadi. Bu yerda ov qilish, daraxt kesish, mol boqish kabi xo‘jalik faoliyatlari qat’iyan taqiqlangan.
Aydar-Arnasoy ko‘llarida 2024-yili noqonuniy ov oqibatida tabiatga 1,7 mlrd so‘mlik zarar yetkazilgani haqida xabar berilgandi. Shuningdek, Navoiyda noqonuniy baliq ovlagan shaxslar tabiatga 6,3 mlrd zarar yetkazgani haqida xabar berilgandi.
Bundan tashqari, Surxondaryo viloyati Sho‘rchi tumanida noqonuniy baliq ovlanishi natijasida tabiatga 1,4 milliard so‘m zarar yetkazilgan edi. O‘zbekiston hududida 2025-yil 1-sentyabrdan 2028-yil 1-yanvargacha ov qilishga moratoriy joriy qilinishi mumkinligi aytilgandi.
Izoh (0)