Qoraqalpog‘istonda Davlat ekologiya qo‘mitasi va “Falcon hunting solutions” kompaniyasi tomonidan O‘zbekiston Qizil kitobi hamda xalqaro Qizil kitobga kiritilgan va yo‘qolib ketish xavfi ostida turgan noyob qush yo‘rg‘a tuvaloqlardan 402 tasi Ustyurt tekisligi hududiga qo‘yib yuborildi. Bu haqda qo‘mita axborot xizmati xabar qildi.
Ma’lumotlarga ko‘ra, Qoraqalpog‘istonda 2017—2021-yillar oralig‘ida jami 9491 bosh yo‘rg‘a tuvaloq tabiatga qo‘yib yuborilgan. Ushbu qush 2009-yilda Qizil kitobga noyob tur sifatida kiritilgan.
Yo‘rg‘a tuvaloq mamlakatda, asosan, Qizilqum cho‘lida, Qozog‘iston, Turkmaniston, Tojikiston, Kavkazorti, Misr, G‘arbiy Osiyo, Mo‘g‘ulistonda uyalaydi. Cho‘llarga bahorga yaqin uchib keladi. Har biri 2-3 donadan tuxum qo‘yadi va 21-25 kun davomida bosib yotadi. Polaponlari iyun—iyul oylarida ucha boshlaydi.
Ayni paytda O‘zbekistonda bu noyob qushlarni maxsus pitomniklarda ko‘paytirib, tabiat bag‘riga qo‘yib yuborish ishlari yo‘lga qo‘yilgan.
Eslatib o‘tamiz, aprel oyida ham 504 ta yo‘rg‘a tuvaloq Ustyurt tekisligiga qo‘yib yuborilgandi.
Mavzuga doir:
Izoh (0)