AQSHda Uolli laqabli alligator g‘oyib bo‘ldi. Uning egasi Joi Henni ta’kidlashicha, uy hayvoniga aylanib ulgurgan alligator Jorjiya shtatining Bransuik shahriga sayohat vaqtida o‘g‘irlab ketilgan. Yirtqich hayvon noma’lum shaxslar tomonidan tabiatga qo‘yib yuborilgan, deya taxmin qilinmoqda, deb yozadi “Pravila jizni” nashri.
Alligator Uolli ijtimoiy tarmoqlarda xotirjam fe’l-atvorli uy hayvoni sifatida nom olgan. U egasiga depressiya va saraton kasalligidan omon qolishda yordam berdi. Uolli insonlar bilan quchoqlashishni yaxshi ko‘rardi.
Aprel oyi oxirida Joi Henni Facebook’dagi “Uolli — insonlarni hissiy qo‘llab-quvvatlaydigan alligator” rasmiy guruhida post qoldirdi va unda jonivor do‘stini mehmonga ketganida o‘g‘irlab ketishganini ma’lum qildi. Afsuski, qidiruvlar hech qanday natija bermadi.
Keyinroq ma’lum bo‘lishicha, AQSH Tabiiy resurslar vazirligi xodimlari Uolli va yana 20 ta alligatorni botqoqlikka qo‘yib yuborgan. Taxminlarga ko‘ra, bu hodisa Uolli o‘g‘irlab ketilgan kuni sodir bo‘lgan. Joi bundan xabar topgach, do‘stlari bilan botqoqlikka yetib keldi, ammo qidiruvlar befoyda edi. Tabiiy resurslar vazirligi xodimi Henniga aytganidek, endi Uollini topishning imkoni yo‘q.
Joi Henni TikTok tarmog‘ida muxlislardan uning do‘stini qaytarib berishlarini yig‘lab so‘ragan videoni joylashtirdi. Alligatorlarni qutqarish bo‘yicha GatorBoys tashkiloti Henniga yordam berishga va’da berdi. GoFundMe platformasidagilar ham uni qo‘llab-quvvatladi.
Alligator Uolli va Joi Henni do‘stligi tarixi
Ov va baliqchilik haqidagi shouning sobiq boshlovchisi Joi Henni 2015-yilda Uollini asrab oldi va alligatorga “Emotsional yordam beruvchi hayvon” (Emotional support animal) sifatida litsenziya berdi. Dastlab hayvon ko‘p narsadan qo‘rqqan, so‘ng tez orada uning xatti-harakati sudraluvchilarning odatiy xatti-harakatlaridan farq qilishini payqagan. Uolli quchoqlashishni, egasi bilan birga vaqt o‘tkazishni va u bilan beysbol o‘yinlariga borishni yaxshi ko‘rardi.
2019-yilda Joining uch nafar oila aʼzosi va to‘rt do‘sti ikki hafta ichida vafot etdi. Alligator unga og‘ir depressiyani yengishga yordam berdi. 2022-yilda unga prostata saratoni tashxisi qo‘yilganda ham Uolli orqali shifo topdi. Alligator haqiqiy uy hayvonidek edi, u hech qachon atrofdagilarga tajovuzkorlik qilmagan va doim egasi bilan yaxshi munosabatda bo‘lgan.
Izoh (0)