Kaliforniyada ayol besh yoshli o‘g‘liga hujum qilgan pumani qo‘l va oyoqlari bilan urib, haydab yubordi, deb xabar beradi Esquire.
Bolakay Amerika yovvoyi mushugi hujum qilgan vaqtda uyi yaqinidagi daraxt yonida o‘ynayotgan bo‘lgan va hayvon uni 40 metrga qadar tortib ketgan. “Bolaning baqirganini eshitgan ona ko‘chaga chiqib, qo‘l va oyoqlari bilan pumani ura boshlagan. Natijada u puma changalidan o‘g‘lini qutqarishga muvaffaq bo‘lgan. Ushbu ona — farzandi hayotini saqlab qolgan qahramon”, — deydi mahalliy Yovvoyi tabiat departamenti kapitani Patrik Foy.
Bolakayning bosh, bo‘yin va gavdasining yuqori qismiga jarohat yetgan. Hozirda u Los-Anjelesdagi bolalar shifoxonasida davolanmoqda.
Mahalliy hududda pumalar hujumi 20 yildan ortiq vaqtdan beri kuzatilmagan. Ekspertlarning hisoblashicha, yirtqich hayvon bolaga uning bo‘yi pastligi uchun hujum qilgan, hayvonning o‘zi esa yosh bo‘lib, 2020-yilning oktabrlarida tug‘ilgan. Bu vaqt oralig‘ida pumalar “ov qilish va o‘zini himoya qilishni o‘rganadi”.
Izoh (0)