Rossiya delegatsiyasi 2-iyun kuni Istanbulda bo‘lib o‘tgan muzokaralarda Ukrainaga urushni to‘xtatish uchun ikkita variantni taklif qildi. Tegishli hujjatni “RIA Novosti” e’lon qildi.
Birinchi variantga ko‘ra, Rossiya qo‘shinlari tomonidan qisman bosib olingan Ukrainaning to‘rtta viloyatidan — Donetsk, Lugansk, Zaporojye va Xersondan ukrain armiyasi bosqichma-bosqich chiqib ketishi kerak. Ukraina o‘z armiyasini Rossiya chegaralaridan “kelishilgan” masofaga olib chiqishi lozim.
Ikkinchi taklif to‘g‘ridan-to‘g‘ri bahsli hududlarni Moskvaga topshirishni nazarda tutmaydi, ammo bir qator shartlarni o‘z ichiga oladi. Ular orasida quyidagilar bor: Ukrainada safarbarlikni taqiqlash va demobilizatsiyani boshlash, xalqaro hamkorlarning Kiyevga qurol-yarog‘, razvedka ma’lumotlari hamda sun’iy yo‘ldosh aloqasini yetkazib berishini to‘xtatish, Rossiya hududidagi “diversiyalar”ga barham berishga kafolat berish, har ikki tomon uchun umumiy amnistiya e’lon qilish va qo‘lga olingan tinch aholini ozod qilish.
Bundan tashqari Rossiya harbiy holat bekor qilingandan keyin 100 kun ichida prezident va parlament (Oliy Rada) saylovlarini o‘tkazishni talab qilmoqda. Ikkinchi variant Ukrainada uchinchi davlat harbiy xizmatchilarining bo‘lishini istisno qiladi. Shuningdek, Ukraina armiyasining harakatlanishini taqiqlashni o‘z ichiga oladi.
Ikki delegatsiyaning Istanbuldagi uchrashuvidan oldin ularning rahbarlari — Ukraina mudofaa vaziri Rustem Umerov va Rossiya prezidenti yordamchisi Vladimir Medinskiy 2,5 soat davomida yuzma-yuz uchrashuv o‘tkazgan.
Rossiya tayyorlagan memorandum loyihasida Moskva uchun muhim bo‘lgan bir qancha tinchlik shartlari keltirilgan. Ular quyidagilar:
- Rossiya bosib olgan hududlarning xalqaro darajada Rossiyaga qarashli deb tan olinishi;
- Ukraina harbiy ittifoqlarga (masalan, NATO) qo‘shilishdan voz kechishi;
- Rus tiliga rasmiy til maqomi berilishi;
- Rossiya va Ukraina o‘rtasidagi barcha mavjud sanksiyalar bekor qilinishi va yangi sanksiyalar kiritilmasligi;
- Rossiya gazining Ukraina orqali tranziti tiklanishi, boshqa iqtisodiy, diplomatik va transport aloqalari qayta yo‘lga qo‘yilishi;
- Urushdan ko‘rilgan zararlarga oid o‘zaro da’volardan voz kechish;
- Ukraina qurolli kuchlarining soni va tarkibiga cheklovlar kiritilishi;
- “Natsizm va neonatsizmni ulug‘lash va targ‘ib qilish” taqiqlanishi, “millatchi” partiyalar tugatilishi;
- Ukrainada yadrosiz maqom saqlanishi;
- Ukraina pravoslav cherkoviga nisbatan amaldagi cheklovlar bekor qilinishi.
Izoh (0)