Rossiyada “Oreshnik” o‘rta masofali ballistik raketasining seriyali ishlab chiqarilishi boshlanadi. Bu haqda mamlakat prezidenti Vladimir Putin ma’lum qildi.
Putinning so‘zlariga ko‘ra, yangi qurol “jang sharoitlarida o‘zini juda yaxshi ko‘rsatgan”.
Ilgarigidek, ustuvor yo‘nalishlardan biri, avvalo, yangi keng ko‘lamli va uzoq muddatli qurollanish dasturi doirasida armiya va flotni texnik jihatdan modernizatsiya qilishdir. Bu borada yadro triadamizga alohida e’tibor qaratamiz, degan Putin.
Rossiya prezidenti strategik raketa qo‘shinlariga zamonaviy “Yars” raketalari yetkazib berilishini aytgan. Aviatsiya tarkibiy qismi 2025-yilda modernizatsiya qilingan Tu-160-M raketa tashuvchi samolyotlari bilan to‘ldirilishi kerak.
Bundan tashqari, jangovar sharoitlarda o‘zini juda yaxshi ko‘rsatgan eng yangi o‘rta masofali “Oreshnik” raketa kompleksini seriyali ishlab chiqarish boshlanmoqda, degan siyosatchi.
Harbiy-dengiz floti tarkibiga so‘nggi avlod yuqori aniqlikdagi qirg‘in qurollari bilan jihozlangan yangi kemalar va suvosti kemalari kiradi. Putinga ko‘ra, Rossiyani armiya va qurol-yarog‘ga keng ko‘lamli mablag‘ sarflashga G‘arb va NATO majbur qilmoqda.
NATOning navbatdagi sammitida alyans imkoniyatlarini yanada kengaytirish bo‘yicha katta dasturni boshlash rejalashtirilgan. Uni amalga oshirish uchun NATO davlatlarining harbiy xarajatlari oshiriladi... Bundan, aslida, global militarizatsiya va qurollanish poygasini kim qo‘zg‘atayotgani ko‘rinib turibdi, degan Putin.
U Rossiya o‘z xavfsizligini ta’minlash uchun “tegishli choralar” ko‘rishi, “suverenitetning kafolati” sifatida armiyani mustahkamlashini aytgan.
Stokgolm xalqaro tinchlik tadqiqotlari instituti (SIPRI) ma’lumotlariga ko‘ra, 2025-yil yanvar oyiga kelib Rossiya qurol arsenalida 592 ta strategik raketa tashuvchi mavjud edi. Ularning yarmidan ko‘pi — 333 tasi quruqlikda joylashtirilgan raketalarga to‘g‘ri keladi, jumladan, Putin tilga olgan 206 ta “Yars” raketalarining har biri 250 kilotonna quvvatga ega to‘rtta jangovar kallakni o‘z ichiga oladi.
Bundan tashqari, Rossiya 78 ta “Topol-M” raketasi, 34 ta yangi “Avangard” kompleksi va 1980-yillarning oxiridan buyon qurollanishda turgan 34 ta “Voyevoda” raketasiga ega.
Izoh (0)