Chirchiqda, bir vaqtlar qarovsiz qolgan xiyobon o‘rnida, shaharning yangi diqqatga sazovor maskani –zamonaviy istirohat bog‘i ochildi. Bog‘ aholining dam olishi, vaqtni maroqli o‘tkazishi va tabiat bilan uyg‘unlikda hordiq chiqarishi uchun qulay maskandir.
PepsiCo kompaniyasining Markaziy Osiyodagi yetakchi bottleri hisobangan International Beverages Tashkent kompaniyasi ushbu yirik loyihani amalga oshirishga 30 milliard so‘mdan ortiq mablag‘ ajratdi. 2024-yil avgustda boshlangan faol obodonlashtirish ishlari 2025-yil aprelda muvaffaqiyatli yakunlandi. Bog‘ning umumiy maydoni qariyb 68 gektarni tashkil etib, shundan 33 gektari o‘zlashtirilgan.
TASHLANDIQ HUDUDNING YASHIL MAKONGA AYLANISHI
Ko‘p yillar davomida bu maydon tashlandiq holda qolib, shaharliklar tomonidan noroziliklarga uchragan edi. Bugun esa bu yerda barpo etilgan zamonaviy bog‘ shahar aholisi va mehmonlari uchun haqiqiy tuhfa bo‘ldi. Ko‘pchilikni fikriga ko‘ra, bu zamonaviy yashil maskan Chirchiqning tashrif qog‘oziga aylanishi mumkin.
Loyihaning tashabbuskori va homiysi International Beverages Tashkent kompaniyasi nafaqat hududni obodonlashtirish, balki dam olish, sport va oilaviy hordiq chiqarish uchun har tomonlama qulay muhit yaratishdek ulkan maqsadni o‘z oldiga qo‘ygan.
Alohida e’tibor ko‘kalamzorlashtirishga qaratilgan: bog‘da 3000 dan ortiq daraxt ekildi, ular orasida qayin, tol, qarag‘ay, shumtol, zarang, eman va jo‘ka daraxtlari bor. Shuningdek, tuya va archa kabi ignabargli daraxtlar ham ekilib, 5 gektardan ortiq maydo Amerika bedapoyasi bilan qoplandi. Tabiat qo‘ynida oilaviy pikniklar uyushtirishga ushbu hudud juda to‘g‘ri keladi. O‘simliklarni parvarishlash uchun 10 gektardan ziyod maydonda zamonaviy sug‘orish tizimi joriy etildi.
BOG‘ INFRATUZILMASI: BARCHA SHAROIT AHOLI UCHUN
Bog‘ loyihasi barcha yosh guruhlarining qiziqishlarini inobatga olgan holda ishlab chiqilgan. Faol turmush tarzi ixlosmandlari uchun zamonaviy mashq maydonchalari, arqonli shaharcha, sun’iy qoya va Zip Coaster ekstremal attraksioni yaratilgan. Ekstremal sport ishqibozlari uchun esa maxsus skeytbord maydonlari qurilgan. Skeytbording muxlislari fikricha, maydon barcha zamonaviy sifat va sport me’morchiligi talablariga to‘liq javob beradi.
Bog‘ning eng e’tiborga sazovor joyi sifatida ko‘l tanlanib, uning maydoni 2 gektardan 3,4 gektargacha kengaytirilgan. Suv havzasining loyqalanishini oldini olish maqsadida uning tubiga maxsus qoplama yotqizilgan. Ko‘lning qirg‘oqlari bo‘ylab qulay yugurish yo‘lakchasi barpo etilgan. Suvda oqqushlar va o‘rdaklar suzib yurgani, ko‘lga yanada go‘zallik va sokinlik bag‘ishlab turadi. Suvning muvozanatni saqlash uchun himoya to‘g‘oni qurilib, ikki qirg‘oqni bog‘lab turadigan ko‘prik piyodalarning sayr qilishiga yangi mazmun kiritishi shubhasiz.
Bog‘ infratuzilmasining yana bir muhim qismi ko‘lning go‘zal manzarasiga qarab turgan amfiteatr hisoblanadi. Bundan keyin tashkil qilinadigan ko‘plab madaniy tadbirlar, konsertlar va festivallar aynan shu yerda o‘tkazilishi kutilmoqda.
XAVFSIZLIK VA QULAYLIK
Bog‘ning qayta tiklanishida tashabbus ko‘rsatganlar avvalo maskanni qurilishida xavfsizlik masalalariga alohida e’tibor qaratishdi. Hudud videokuzatuv tizimi, yoritish moslamalari, qulay piyodalar yo‘laklari va avtomobil to‘xtash joylari bilan jihozlangan. Imkoniyati cheklangan shaxslar uchun ham barcha qulayliklar mavjud bo‘lib, bog‘ning loyihasiga ko‘ra har bir mehmon hudud bo‘ylab xavfsiz harakatlanishi va maroqli vaqt o‘tkazishi uchun ushbu maskanda eng zamonaviy sharoitlar yaratilgan.
Bugungi kunda Chirchiqdagi yangi bog‘ shunchaki obodonlashtirilgan hudud emas, balki shaharliklar va sayyohlar uchun dam olish, muloqot qilish va faol vaqt o‘tkazish uchun yangi imkoniyatlar taqdim etadigan zamonaviy diqqatga sazovor go‘shadir.
Reklama huquqi asosida
Izoh (0)