Dubayda Moviy chiziqni kengaytirish doirasida dunyodagi eng baland metro bekati barpo etiladi. Dubai Creek Harbor hududida joylashadigan bekat Emaar Properties Station deb nomlanib, hayratlanarli 74 metr balandlikka ko‘tariladi. Bu haqda Khaleej Times nashri xabar bermoqda.
Ma’lum qilinishicha, bekatni Burj Xalifa loyihasining ham muallifi bo‘lgan amerikalik Skidmore, Owings & Merrill arxitektura kompaniyasi loyihalashtirgan. Ularning Emaar Properties bekati loyihasi “kesishuvchi darvozalar” g‘oyasidan ilhom olib, 11 ming kvadrat metr maydonni egallaydi va kuniga 160 minggacha yo‘lovchini qabul qila oladi.
Moviy chiziq uchta o‘tish bekati orqali mavjud Qizil va Yashil metro chiziqlariga ulanib, shaharning transport qulayligini oshirishga xizmat qiladi. 2029-yilda ishga tushirilgandan so‘ng, u Akademik shahar, Al-Varka, Dubayning Silikon vodiysi, Xalqaro shahar va Mirdif kabi asosiy turar-joy va biznes markazlariga kirish imkonini beradi.
Dubay metrosi Fors ko‘rfazi mamlakatlaridagi birinchi o‘ta zamonaviy, dunyodagi eng uzun, to‘liq avtomatlashtirilgan va haydovchisiz tezyurar poyezdlar tarmog‘i hisoblanadi. Bundan tashqari, u arzon va qulay harakatlanish usuli bo‘lib, megapolisning barcha diqqatga sazovor joylariga qulay sayohatlarni ta’minlaydi. Har oyda 5 million sayyoh va mahalliy aholi tezyurar poyezdlar xizmatidan foydalanadi.
Metro tizimi umumiy uzunligi 75 km bo‘lgan ikkita liniyadan iborat. Qizil liniya Rashidiyadan Jabal Aligacha, asosan Shayx Zayed shossesi bo‘ylab o‘tadi. Qisqaroq yashil liniya esa qirg‘oq bo‘ylab xalqaro aeroportning erkin iqtisodiy zonasidan tarixiy Dubay-Krik ko‘rfazigacha cho‘zilgan. Qizil va yashil liniyalar Union va Bur Juman o‘tish bekatlarida kesishadi. Ikkala liniya ham Wi-Fi, jismoniy imkoniyati cheklangan yo‘lovchilar uchun qulay kirish, avtoturargoh va bankomatlar xizmatlarini taqdim etadi.
Dubay metrosi 2009-yilda ishga tushirilganidan beri uzluksiz rivojlanib kelmoqda.
Izoh (0)