O‘zbekiston terma jamoasi hujumchisi Eldor Shomurodov Jahon chempionati saralashi doirasidagi BAAga qarshi bo‘lajak o‘yin oldidan o‘z fikrlarini bildirib o‘tdi.
Hujumchining fikriga ko‘ra, jamoaning xato qilishga umuman haqqi yo‘q:
Hammada kayfiyat aʼlo darajada. Bosim yo‘q. Jamoa bugun yig‘ildi. Dubayda yig‘inning ikkinchi qismini olib boramiz. Hech qanday xavotir yo‘q. Biz nima qilishimiz kerakligi va bizni qanday o‘yin kutib turganini bilamiz. Bunday o‘yindan oldin ortiqcha motivatsiya ham shart emas deb o‘ylayman. Hamma futbolchilar tayyor va bizga qandaydir omillar xalaqit qiladi deb o‘ylamayman.
O‘zimni yaxshi his etyapman. Bellashuvga 100 foiz tayyorman. Tayyorgarlik uchun hali yana 1 hafta vaqtimiz bor. Birinchi navbatda, issiq havoga moslashimiz kerak. JCH orzusi nafaqat menda, balki termadagi har bir futbolchida bor. Butun O‘zbekiston bizdan nimani kutayotganini tushunib turibmiz. Bu safar xato qilishga haqqimiz yo‘q degan fikrdaman, dedi Shomurodov.
Eslatib o‘tamiz, bugun, 29-may kuni O‘zbekiston terma jamoasi Dubay shahriga uchib ketdi. Temur Kapadze shogirdlari yig‘inning ikkinchi qismini BAAda davom ettiradi.
Ma’lumot uchun, BAA — O‘zbekiston uchrashuvi 5-iyun kuni Abu-Dabidagi “Al-Nahyan” stadionida bo‘lib o‘tadi. Uchrashuv O‘zbekiston vaqti bilan 21:00 da boshlanadi.
Izoh (0)