BAAdagi turli aeroportlar orqali mamlakat hududiga kirib kelayotgan xorijliklarning, shu jumladan O‘zbekiston fuqarolarining tekshiruvlari cho‘zilib ketgani haqida xabarlar tarqaldi. Tashqi ishlar vaziri matbuot kotibi Ahror Burxonov bu holat alohida monitoring qilib borilayotganini bildirdi.
“Ayni paytda fuqarolarimizning qonuniy huquqlari va manfaatlarini himoya qilish uchun barcha chora-tadbirlar ko‘rilmoqda. Mamlakatimizning Abu-Dabi shahridagi elchixonasi hamda Dubay shahridagi Bosh konsulxonasi BAAning tegishli tashkilotlari bilan ushbu masalada zudlik bilan muzokaralar o‘tkazdi va vaziyatni yaxshilash bo‘yicha doimiy aloqada bo‘lib turmoqda”, deydi TIV vakili.
BAA tomoni ma’lumotlariga ko‘ra, mamlakatda turli xalqaro tadbirlar munosabati bilan xavfsizlik choralari kuchaytirilgani sababli aeroportlarda tekshiruv vaqtlari cho‘zilib ketmoqda.
Ahror Burxonovning bildirishicha, hozirda O‘zbekiston fuqarolarini tezlik bilan tekshiruvdan o‘tkazish uchun barcha imkoniyatlar safarbar etilgan va natijada ular mamlakat hududiga kirib kelishni boshlagan.
5-iyun kuni BAAda futbol bo‘yicha O‘zbekiston milliy jamoasi JCH-2026 saralashi 3-bosqichi doirasida ushbu mamlakat jamoasi bilan o‘ynaydi. Shu maqsadda aksariyat o‘zbekistonliklar muxlislik qilish uchun BAAga yo‘l olgandi.
Toshkent shahar Turizm boshqarmasi turfirmalar va tadbirkorlarga 5-iyun kuni BAAga turist yubormaslik choralarini ko‘rishni tavsiya etgandi. O‘zbekistonlik muxlislarning o‘yingohga sig‘maslik ehtimoli yuqori ekanligi, bu esa xavfsizlik bilan bog‘liq muammolarni keltirib chiqarishi, talablarining buzilishiga olib kelishi haqida ma’lumot berilgan. BAA aeroportlarida xavfsizlik idoralari tomonidan fuqarolarni qaytarib yuborishga asos sifatida taxmin qilinayotganini inobatga olib, BAAga turpaketlar orqali turistlarni yubormaslik choralarini ko‘rish tavsiya etilgandi.
Izoh (0)