Tojikistondan O‘zbekistonga 16 kilo giyohvandlik vositasi keltirgan shaxs 15 yilga ozodlikdan mahrum etildi. Bu haqda Davlat xavfsizlik xizmati matbuot xizmati xabar berdi.
2024-yilning 12-noyabr kuni DXX xodimlari tomonidan Namangan viloyatida o‘tkazilgan tezkor tadbirda, Pop tumani hududida harakatlanayotgan Lacetti to‘xtatilib, tekshirilganda, unda yo‘lovchi sifatida ketayotgan, Farg‘ona viloyatining Dang‘ara tumanida yashovchi, 1984-yilda tug‘ilgan fuqaro yuk sumkasida 3 kilo 887 gramm opiy va 9 kilogramm 839 gramm gashish moddalari topilgan.
Tergovga qadar tekshiruv harakatlari davomida, u Tojikiston fuqarosi bilan o‘zaro til biriktirib, qo‘shni davlatdan giyohvandlik vositalarini kontrabanda qilish hamda sotib, daromad topishni rejalashtirgani va bu giyohvand moddani Toshkent viloyatining Bo‘ka tumanida qabul qilib olgani aniqlangan.
Holat yuzasidan qo‘zg‘atilgan jinoyat ishi doirasida tezkor-tergov tadbirlari davom ettirilib, 2024-yilning avgust—sentyabr oylarida tojikistonlik narkosavdogar tomonidan Bo‘ka tumaniga yetkazib berilgan va mazkur shaxs qabul qilib olib, Dang‘ara tumanida joylashgan o‘ziga tegishli yer uchastkasiga yashirib qo‘ygan 1 kilo 902 gramm opiy va 857 gramm gashish moddalari hamda 1 dona “Makarov” pistoleti, 2 dona o‘qdon va 18 dona patron ham protsessual tartibda rasmiylashtirib olingan.
Jinoyat ishlari bo‘yicha Pop tuman sudi tomonidan 2025-yil 5-may kuni mazkur fuqaro Jinoyat kodeksining 28,246-moddasining (kontrabanda) 1- va 2-qismlarida hamda 25,273-moddasining (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismida nazarda tutilgan jinoyatlarni sodir etganlikda aybli deb topilib, 15 yilga ozodlikdan mahrum etildi.
Izoh (0)