Toshkent shahri Yangihayot tumani IIO FMBning vakolati doirasidan chetga chiqib, qamoqqa olingan fuqarolarni qiynoqqa solishda ayblangan uch xodimi jazolandi. “Daryo” sud hujjati bilan tanishdi.
Sud hukmida keltirilishicha, ular Yangihayot tumani IIO FMB katta tezkor vakili F.Qorayev hamda PPX inspektori lavozimida ishlagan B.Shonazarov va K.Mirzaboyev bo‘lib, 2024-yil avgustida turli ko‘rinishda tazyiq o‘tkazib, qiynoqqa solib, fuqarolarga giyohvand modda bilan bog‘liq, ular sodir etmagan jinoyatni bo‘yniga olishga majburlagan.
“Meni kamerasiz xonaga olib kirishdi. Qo‘llarimga kishan solib, qo‘llarimni yuqoriga, devorga qaratib ko‘tarishga majbur qilishdi. Boshimga bir nechta qora paket kiydirib, skotch bilan o‘rab qo‘yishdi. Bo‘g‘ilib ketdim. Keyin orqamga, oyoqlarimga urishdi, elektroshoker qo‘llashdi...”, degan qiynoqqa solingan fuqarolardan biri M.A.
Ekspertiza unda ko‘plab jarohatlar, jumladan, elektroshok ta’siriga xos bo‘lgan zarba va kuyish izlari borligini tasdiqlagan.
“Nafasim siqilib, o‘lib qolaman deb o‘yladim... barchasini bo‘ynimga olaman, faqat qiynamanglar, urmanglar, dedim”, degan u suddagi ko‘rsatmasida.
Yana bir jabrlanuvchi A.I. IIB xodimlari unga og‘ir tan jarohati yetkazganini aytgan.
“Xodimlardan biri kerakli qog‘ozlarga imzo chekishga rozi bo‘lgunimgacha meni kaltakladi, dubinka zarbasi boshimga tegdi. Shundan so‘ng quloq pardam yirtilib ketdi...”, degan u.
Tibbiy xulosaga ko‘ra, A.I.da og‘ir bosh jarohati, tan jarohatlari va ruhiy shikastlanish belgilari aniqlangan.
Yana bir fuqaro I.S. ham qiynoqqa solinganini, jumladan, “zajigalka”ni yoqib, uning jinsiy a’zosiga yaqinlashtirib, jinoyatni bo‘yniga olishga majburlashganini, bundan qo‘rqib ketib, ular xohlagan narsani yozib berishga rozilik bildirganini aytgan.
Yangihayot tumani IIO FMB binosiga DXX xodimlari kelib, jinoyatda ayblanayotgan fuqarolarni o‘zlari bilan DXX Toshkent shahri bo‘yicha boshqarmasi binosiga olib borgach, fuqarolar o‘zlariga ma’lum bo‘lgan barcha haqiqiy holatlarni so‘zlab bergan.
Jinoyat ishlari bo‘yicha Chilonzor tuman sudining 2025-yil 16-maydagi hukmi bilan F.Qorayev va K.Mirzaboyevga 5 yil 1 oyga, B.Shonazarovga 11 yil muddatga ozodlikdan mahrum qilish jazosi tayinlangan.
Izoh (0)