DXX Farg‘onada sifati kafolatlanmagan 8 mlrd so‘mlik dori vositalari va 400 mln so‘mlik tibbiyot jihozlarining savdoga chiqarilishi oldi olinganini ma’lum qildi.
Keltirilishicha, Davlat xavfsizlik xizmatining Farg‘ona viloyati bo‘yicha boshqarmasi hamda viloyat bojxona boshqarmasi xodimlari hamkorligida o‘tkazilgan tezkor tadbirda Farg‘ona shahrida yashovchi fuqaro boshqaruvidagi Nexia-3 Bog‘dod tumani hududida to‘xtatilib, tekshirildi. Natijada avtomashina salonida 8 turdagi 413 dona sifati kafolatlanmagan dori vositalari borligi aniqlandi.
Shuningdek, Bag‘dod tumanida joylashgan va mazkur fuqaroga tegishli bo‘lgan 2 ta ombor ko‘zdan kechirilganda, sifat sertifikatiga ega bo‘lmagan jami 60 turdagi 100 ming 332 dona dori vositalari noqonuniy saqlanayotgani aniqlanib, protsessual tartibda rasmiylashtirib olindi.
Tezkor tadbir davom ettirilib, Farg‘ona shahrida joylashgan ombordan esa noqonuniy saqlanayotgan 39 turdagi 16 897 dona dori vositalari ashyoviy dalil sifatida olindi. O‘tkazilgan tezkor tadbirlar davomida, dastlabki umumiy qiymati jami 8 milliard 1 million 429 ming so‘mlik 117 ming 642 dona sifati kafolatlanmagan dori vositalari vaqtincha saqlovga olindi.
Bu yo‘nalishdagi tadbirlar davom etirilib, Marg‘ilon shahrida yashovchi fuqaroga tegishli 3 ta yashirin omborda Qirg‘izistondan aylanma yo‘llar orqali olib kelingan, umumiy qiymati 400 mln so‘mlik 15 turdagi kateter igna, jgut, elektron termometr, tonometr kabi jami 30 ming dona tibbiyot jihozlari saqlanayotgani aniqlanib, protsessual tartibda rasmiylashtirildi.
Hozirda mazkur holatlar bo‘yicha tergovga qadar tekshiruv harakatlari olib borilmoqda.
2025-yilning boshlarida Jizzaxda 588 million so‘mlik sifati kafolatlanmagan dorilar sotuvga chiqib ketishining oldi olingandi.
2024-yil avgust oyida Andijonda noqonuniy dori vositalari savdosi bilan shug‘ullanganlarga hukm o‘qilgandi. Dori vositalarining umumiy qiymati 1 mlrd 616 mln 802 ming so‘mni tashkil qilgan. Jinoyat ishlari bo‘yicha Qo‘rg‘ontepa tuman sudi tomonidan fuqaroga nisbatan 5 yil hamda sherigiga nisbatan 3 yil muddatga ozodlikdan mahrum qilish jazosi tayinlangan.
Izoh (0)