“Ijodkor yoshlarni qo‘llab-quvvatlash va rag‘batlantirishning qo‘shimcha chora-tadbirlari to‘g‘risida”gi hukumat qarori qabul qilindi.
Mazkur qarorga ko‘ra, madaniyat va sanʼat sohasida iqtidorli yoshlarni qo‘llab-quvvatlash maqsadida quyidagilar yo‘lga qo‘yiladi:
- ijodkor yoshlar faoliyatini muvofiqlashtiruvchi yagona platforma joriy etiladi hamda “ERP madaniyat” yagona boshqaruv tizimiga integratsiya qilinadi;
- madaniyat sohasida sunʼiy intellektdan hamda zamonaviy texnologiyalardan foydalanish bo‘yicha “Ijodiy texnolaboratoriya” tashkil etiladi;
- umumiy o‘rta va o‘rta maxsus taʼlim tashkilotlarida “Ijodkor yoshlar klubi” faoliyati yo‘lga qo‘yiladi;
- “Madaniyat volontyorlari” ijtimoiy harakati faoliyati yo‘lga qo‘yiladi.
Shuningdek, har yili jahonning kamida 4 nafar yetakchi mutaxassislari va taniqli sanʼatkorlari o‘quv jarayonlariga jalb etiladi hamda kamida 4 nafar ijodkor yoshlar xorijiy mamlakatlarga tajriba almashish uchun yuboriladi.
Madaniyat va sanʼat yo‘nalishidagi Start-Up loyihalari uchun BHMning 100 baravarigacha miqdorida ijodiy grantlar ajratish choralari ko‘riladi. 2026-yildan Madaniyat vazirligi tomonidan tasdiqlanadigan yillik kalendar-reja asosida yoshlar uchun tanlov va festivallar tashkil etiladi.
Hukumatning “Konsert-tomosha faoliyatida jonli ijroni yanada rag‘batlantirish bo‘yicha qo‘shimcha chora tadbirlar to‘g‘risida”gi qarori qabul qilindi.
Qarorga muvofiq, 2025-yil 1-maydan davlat byudjeti va byudjetdan tashqari mablag‘lar hisobidan moliyalashtiriladigan barcha konsert-tomosha tadbirlarida fonogrammadan foydalanish bosqichma-bosqich cheklanadi.
Izoh (0)