Taniqli xonanda Shahnoza Otaboyeva “Milliy” telekanalining “Ayol qalbi” ko‘rsatuviga bergan intervyusida san’atdagi tanaffusi, shaxsiy hayoti va onalik mas’uliyati haqida gapirib berdi.
Shahnozaning aytishicha, u san’atdan vaqtincha chekinishga majbur bo‘lgan. Bu tanaffus oilaviy tashvishlar va farzandlar tarbiyasi bilan bog‘liq bo‘lgan. Ko‘plab san’atkorlar san’atdan ketib, bir muddatdan so‘ng yana qaytgan, biroq ularning bu qaytishi har doim ham muvaffaqiyatli bo‘lmagan.
Men yana san’atga qaytib, zo‘r bo‘lib ketdim, deya olmayman. Aslida, bu qaytishim ruhiy tushkunliklardan chiqish, ichimdagi og‘riqni ijod orqali chiqarish edi, deydi xonanda.
Shahnoza ayol kishining hayotida har xil davrlar bo‘lishini ta’kidladi. Ba’zilarning hayoti chiroyli kechsa, boshqalarida u notekis bo‘ladi. Buni anglash esa vaqt talab qiladi.
Oilam buzilishi arafasida atrofimdagilar “sen ijodni to‘xtatib qo‘yding, hayoting faqat bola-chaqa bo‘lib qoldi, axir sen Shahnoza Otaboyevasan-ku” kabi so‘zlar bilan o‘zini do‘st ko‘rsatib hayotimni buzganlar ham bo‘ldi, deydi u.
Xonanda ajrashganidan keyin hayoti izga tushganini, vaqtini chiroyli o‘tkaza boshlaganini aytdi. U mehnati bilan farzandlarini oyoqqa turg‘izganini ta’kidladi.
Shahnozaga 2-xotinlik taklifi ham tushgan. Biroq u hech qachon boshqa ayolning baxti hisobiga turmush qurishni xohlamagan.
Men birovning oilasini buzib, uning baxtsizligi evaziga o‘z baxtimni qurmoqchi emasman, deydi u.
Xonanda sobiq turmush o‘rtog‘i bilan ajrashgani haqida ijtimoiy tarmoqqa video joylaydi. O‘sha videodan keyin sovchilar, turmushga chiqish takliflari ko‘payganini aytdi.
Shu paytda o‘zimga savol bera boshladim: Ha, men hozir turmushga chiqishim mumkin. Lekin bolalarim-chi? Menga taklif bildirmoqchi bo‘lgan inson ular uchun otalik qila olarmikan? Axir farzandlarimning yuragida hali ham o‘z otalariga nisbatan iliq tuyg‘ular bor. Bu tabiiy. Men uchun esa har bir taklif ortida faqat “turmush qurish” emas, balki butun bir hayot taroziga tushadi: u inson bolalarimni chin yurakdan qabul qila oladimi? Ularga mehr bera oladimi? Men uchun ham bu muhim — birinchi o‘rinda farzandlarim turadi, ta’kidladi u.
Bundan oldin sobiq turmush o‘rtog‘i bilan yarashib, qayta ajrashganini ham yashirmadi. Ammo bu yarashuv uzoqqa bormagan. Uning aytishicha, ko‘plab tuhmatlarga qolgani va sobiq turmush o‘rtog‘ining “Nega yarashganimizni ommaga olib chiqmayapsan, hayotingda boshqa odam bormi?” degan savollari bu munosabatni yana izdan chiqargan.
Biz bolalar uchun yana bir bor urinib ko‘rdik, lekin baribir ajrashdik. Hozirda do‘stona munosabatdamiz, deydi xonanda.
Xonanda, agar hayotga qayta kelish imkoniyati bo‘lganida, san’at sohasiga umuman kirmasligini, balki oddiy hayotni tanlab, oddiy ayol sifatida yashashni xohlaganini aytdi.
20 yoshga qaytishni juda xohlardim. Agar shunday imkon bo‘lganida, san’atni emas, oddiy hayotni tanlagan bo‘lardim. Hatto styuardessa bo‘lishni istaganman, deydi u afsus bilan.
Shahnoza yosh ayollarga sabrli bo‘lishni maslahat berdi. Uning fikricha, ikki-uch yil vaqt degani hayot uchun unchalik katta bo‘lmagan muddat. Oldin kamida 10-15 yil yashab ko‘rib, keyin qaror qabul qiling, deydi u.
U realist ekanini, muhabbatga emas, haqiqatga asoslangan hayot kechirish tarafdori ekanini ham ta’kidladi. Nilufar Usmonovaning bir so‘zini iqtibos keltirib, hayotdagi qiyinchiliklar uni o‘zining asl holatiga qaytarganini aytdi.
Meni g‘am-tashvish semirtirib yuborgandi. Ajrim esa meni yana asl Shahnozaga qaytardi, deydi u.
Xonanda intervyu yakunida “O‘zim uchun emas, faqat farzandlarim uchun yashashga o‘rganib qoldim”, deydi.
Izoh (0)