Toshkent viloyati, Ohangaron tumanida joylashgan konteynerli yuklarni ortib tushirish maydoni va oshxona kimoshdi savdosida sotildi. Ma’lumotlar “E-auksion” portalida e’lon qilingan.
Lot auksionga Davlat aktivlarini boshqarish agentligi Toshkent viloyati hududiy boshqarmasi tomonidan joylashtirilgan edi.
Ushbu noturar joyning qurilgan yili noma’lum. Yer uchastkasining umumiy maydoni — 8,5 gektar. Binolarning maydoni — 3294,80 kvadrat metr. Unda suv va elektr ta’minoti mavjud. Gaz va kanalizatsiya tizimi esa yo‘q.
Auksionga qo‘yilgan binoning boshlang‘ich bahosi 14,5 mlrd so‘m edi. 25-aprel kuni bo‘lib o‘tgan savdolarda u 15,2 mlrd so‘mga sotildi.
Onlayn savdoda 1 nafar savdogar — My Freighter aviakompaniyasi ishtirok etgan va auksion g‘olibi bo‘lgan.
Kompaniya haqida
2020-yilda tashkil qilingan My Freighter kompaniyasi O‘zbekiston va Markaziy Osiyodagi eng tez rivojlanayotgan havo yuk kompaniyalaridan biridir. Kompaniya ustav fondi — 417,6 trln so‘m.
My Freighter Xitoyning o‘nta yirik shahrida o‘z omborlariga ega, yuk yig‘ish punktlari Yevropada Chexiya, Luksemburg, Germaniya, Fransiya, Italiya va Niderlandiyada, shuningdek, BAAda, Janubiy Koreyada, Rossiya, Braziliya va Vyetnamda joylashgan.
Shuningdek, My Freighter Centrum Air brendi ostida yo‘lovchi reyslarini ham amalga oshiradi.
Centrum Air kompaniyasida 250 nafar mahalliy va 400 nafardan ortiq xorijiy mutaxassis ishlaydi.
Ayni paytda aviakompaniya har biri 180 kishiga mo‘ljallangan beshta Boeing 737 va A320 samolyotlari yordamida yo‘lovchilarga xizmat ko‘rsatadi. 2023-yilda kompaniya o‘z parkini 20 ta samolyotga kengaytirishni, keyingi uch yilda esa bu raqamni 100 taga yetkazishni rejalashtirmoqda.
Izoh (0)