Parijda namoyishchi fermerlar traktorlarda qishloq xo‘jaligi to‘g‘risidagi qonun loyihasini ko‘rib chiqish boshlanishi oldidan Fransiya parlamentining quyi palatasi — Milliy assambleya binosiga yetib kelishdi. Bu haqda Le Parisien nashri xabar berdi.
Ma’lum qilinishicha, o‘nlab traktorlar parlament binosining darvozasi oldiga to‘xtagan. Ularga aksiyani tashkil etayotgan FNSEA va Jeunes Agriculteurs kasaba uyushmalari bayroqlari o‘rnatilgan.
Reja bo‘yicha, aksiyaga 200 ga yaqin kishi qo‘shiladi. Namoyishchilar yonida bir nechta politsiya mashinasi navbatchilik qilmoqda. Tashkilotchilarning aytishicha, aksiya shahar prefekturasi bilan kelishilgan. Biroq traktorlarga yopishtirilgan norozilik shiorlari oq qog‘oz bilan berkitib qo‘yilgan.
“Dushanba kuni ertalab Il-de-Fransning bir nechta yo‘llarida, ayniqsa Ivelin va Val-d’Uaz departamentlarida harakatlanish qiyinlashdi. Fermerlar Parij atrofidagi asosiy yo‘llarni noma’lum muddatga yopishni rejalashtirmoqda, chunki Milliy assambleyada qishloq xo‘jaligini tartibga solish, jumladan, pestitsidlardan foydalanish bo‘yicha qonun loyihasi muhokamasi boshlanmoqda”, deya ta’kidlamoqda nashr.
Dehqonlar qonun loyihasini qo‘llab-quvvatlamoqda, ammo so‘l partiya deputatlari kiritmoqchi bo‘lgan ko‘plab tuzatishlar tufayli uning muhokamasi cho‘zilib ketishidan xavotirda. Ular esa o‘z navbatida qishloq xo‘jaligi faoliyatini tartibga solishni yengillashtirish, masalan, fermerlarga qurg‘oqchilik bo‘lgan taqdirda suv omborlarini to‘ldirishga ruxsat berish ekologiyaga salbiy ta’sir ko‘rsatishidan qo‘rqmoqda.
“Hech qayerga bormaymiz. Biz 18 oydan buyon hukumatdan biron-bir o‘zgarish kutmoqdamiz”, dedi namoyishchilardan biri.
Traktordagi fermerlar mamlakat avtomobil yo‘llarida “shilliqqurt operatsiyalari”ni amalga oshirmoqda. Ular past tezlikda harakatlanib, ataylab transport harakatini sekinlashtirmoqda.
O‘tgan hafta fermerlar mamlakat shimolidagi Nor va Pa-de-Kale departamentlarida bir nechta avtoyo‘lni to‘sib qo‘ygan edi. Fermerlar byurokratik tartib-qoidalarni, ularning faoliyatini sertifikatlash tartibini soddalashtirishi va pestitsidlardan foydalanishni cheklashni qayta ko‘rib chiqishi kerak bo‘lgan qonun loyihasidagi chora-tadbirlardan norozi.
Izoh (0)