Prezidentning tegishli qarori bilan Gayane Umerova Madaniyat va san’atni rivojlantirish jamg‘armasi raisi lavozimiga tayinlandi, deb xabar bermoqda O‘zA.
2023-yil 1-iyundagi prezident qaroriga muvofiq, u bir vaqtning o‘zida UNESCO bo‘yicha O‘zbekiston Milliy komissiyasining raisi hisoblanadi.
Gayane Umerova 2008-yilda Toshkent shahridagi Xalqaro Vestminster universiteti (bakalavr), 2012-yilda esa Sotheby’s San’at instituti va Manchester universiteti (magistratura)ni tugallagan. Sotheby’s auksion uyida, Victoria&Albert muzeyi (Buyuk Britaniya)da hamda Jorj Pompidu markazi (Fransiya)da malaka oshirgan.
U 2008—2017-yillarda O‘zbekiston tasviriy san’at galereyasining Ko‘rgazmalar va jamg‘armalar bo‘limida yetakchi mutaxassis bo‘lib, 2017-yildan boshlab Madaniyat vazirligi huzuridagi San’at va madaniyatni rivojlantirish jamg‘armasining moliya boshqaruvi bo‘limi boshlig‘i lavozimida faoliyat yuritgan.
Tayinlovga qadar 2020-yilning dekabridan buyon Madaniyat va san’atni rivojlantirish jamg‘armasining ijrochi direktori va O‘zbekistonning UNESCO ishlari bo‘yicha Milliy komissiyasi bosh kotibi lavozimlarida ishlab kelayotgandi.
Izoh (0)