Yaponiyada qishloq xo‘jaligi vaziri o‘ziga guruch sovg‘a qilinayotganini tan olgach, mojaro avj oldi

Yaponiya qishloq, o‘rmon va baliq xo‘jaligi Taku Eto o‘ziga guruch sovg‘a qilinayotganini tan olgach, mojaro avj oldi. Bu haqda Saga Shimbun gazetasi xabar qilmoqda.

Yaponiya qishloq xo‘jaligi vaziri Taku Eto rasmiy tadbirda so‘zga chiqib, hech qachon guruch sotib olmaganini, chunki unga shundoq ham ko‘p sovg‘a qilinishini aytgan.

Ta’kidlanishicha, bu fikr so‘nggi oylarda guruch narxining misli ko‘rilmagan darajada — bir yil ichida ikki baravarga oshgani fonida bildirilgan. Bunga qarshi kurashish uchun hukumat tarixda birinchi marta tinchlik davrida va tabiiy ofatlarsiz davlat zaxiralaridan guruch sotishni boshlashga majbur bo‘lgan. Dastlab bu chora vaqtinchalik edi, biroq guruch narxining o‘sishi davom etgani sababli hukumat uni iyulgacha uzaytirgan.

“Men guruch narxining oshishi masalasida o‘z mas’uliyatimni his qilaman. Lekin ochig‘ini aytsam, o‘zim hech qachon guruch sotib olmaganman. Meni qo‘llab-quvvatlaydiganlar menga shunchalik ko‘p sovg‘a qilishadiki, hatto sotishga to‘g‘ri keladi”, dedi u Saga prefekturasida Liberal-demokratik partiyani qo‘llab-quvvatlash uchun xayriya yig‘ish maqsadida o‘tkazilgan pulli yig‘ilishda.

Mamlakatdagi vaziyat fonida vazirning noo‘rin so‘zlari masalasi hukumat bosh kotibi Yosimasa Hayasining matbuot anjumanida ko‘tarilgan. Bosh kotib savolga javob berish maqsadida yordamchilaridan maslahat kutgancha deyarli bir yarim daqiqa jim turgan. So‘ngra hukumat voqea haqida OAVdan xabardor ekanligini, ammo tafsilotlarni bilmagani uchun izoh berishdan o‘zini tiyishini aytgan.

Taku Eto avj olayotgan janjal fonida guruch sotib olganini ta’kidlashni boshlagan va turmush o‘rtog‘i unga qo‘ng‘iroq qilib, norozilik bildirganini va “sotish uchun bunday miqdor yo‘qligini” aytganini tan olgan.

“Oilada faqat ikkovimiz, balki olganimiz yetarlidir. Ammo yetmasa xarid qilishga boramiz. Shuning uchun har doim faqat olgan sovg‘alarimiz hisobiga yashay olmas ekanmiz... Bu ayrim kishilarning, eski do‘stlarning sovg‘asi. Ba’zilar har yili sovg‘a qiladi, ba’zilar yillar qilmaydi. Bu xususiy shaxslarning sovg‘asi va menda ko‘p degan so‘zlarim mubolag‘a edi”, deya qo‘shimcha qilgan Taku Eto.