Япония қишлоқ, ўрмон ва балиқ хўжалиги Таку Это ўзига гуруч совға қилинаётганини тан олгач, можаро авж олди. Бу ҳақда Saga Shimbun газетаси хабар қилмоқда.
Япония қишлоқ хўжалиги вазири Таку Это расмий тадбирда сўзга чиқиб, ҳеч қачон гуруч сотиб олмаганини, чунки унга шундоқ ҳам кўп совға қилинишини айтган.
Таъкидланишича, бу фикр сўнгги ойларда гуруч нархининг мисли кўрилмаган даражада — бир йил ичида икки бараварга ошгани фонида билдирилган. Бунга қарши курашиш учун ҳукумат тарихда биринчи марта тинчлик даврида ва табиий офатларсиз давлат захираларидан гуруч сотишни бошлашга мажбур бўлган. Дастлаб бу чора вақтинчалик эди, бироқ гуруч нархининг ўсиши давом этгани сабабли ҳукумат уни июлгача узайтирган.
“Мен гуруч нархининг ошиши масаласида ўз масъулиятимни ҳис қиламан. Лекин очиғини айтсам, ўзим ҳеч қачон гуруч сотиб олмаганман. Мени қўллаб-қувватлайдиганлар менга шунчалик кўп совға қилишадики, ҳатто сотишга тўғри келади”, деди у Сага префектурасида Либерал-демократик партияни қўллаб-қувватлаш учун хайрия йиғиш мақсадида ўтказилган пулли йиғилишда.
Мамлакатдаги вазият фонида вазирнинг ноўрин сўзлари масаласи ҳукумат бош котиби Ёсимаса Ҳаясининг матбуот анжуманида кўтарилган. Бош котиб саволга жавоб бериш мақсадида ёрдамчиларидан маслаҳат кутганча деярли бир ярим дақиқа жим турган. Сўнгра ҳукумат воқеа ҳақида ОАВдан хабардор эканлигини, аммо тафсилотларни билмагани учун изоҳ беришдан ўзини тийишини айтган.
Таку Это авж олаётган жанжал фонида гуруч сотиб олганини таъкидлашни бошлаган ва турмуш ўртоғи унга қўнғироқ қилиб, норозилик билдирганини ва “сотиш учун бундай миқдор йўқлигини” айтганини тан олган.
“Оилада фақат икковимиз, балки олганимиз етарлидир. Аммо етмаса харид қилишга борамиз. Шунинг учун ҳар доим фақат олган совғаларимиз ҳисобига яшай олмас эканмиз... Бу айрим кишиларнинг, эски дўстларнинг совғаси. Баъзилар ҳар йили совға қилади, баъзилар йиллар қилмайди. Бу хусусий шахсларнинг совғаси ва менда кўп деган сўзларим муболаға эди”, дея қўшимча қилган Таку Это.
Изоҳ (0)