Senat alkogol va tamaki mahsulotlari tarqatilishi hamda iste’mol qilinishini cheklashga oid qonunni rad etdi

Senatning 13-iyun kuni bo‘lib o‘tgan yalpi majlisida “Alkogol va tamaki mahsulotlarining tarqatilishini hamda iste’mol qilinishini cheklash to‘g‘risida”gi qonun bir qancha asoslar sabab rad etildi. Bu haqda “Daryo” muxbiri xabar bermoqda.

Majlisda senator Odiljon Eminov qonunni qabul qilishni rad etish uchun asoslar keltirdi. “Qonunni dastlabki tarzda ko‘rib chiqish jarayonida asosiy tushunchalarga aniqlik kiritish ehtiyoji mavjudligi, davlat organlarida takrorlovchi vakolatlar, turli yosh toifasidagi subyektlar belgilangani, kiritilayotgan cheklov va taqiqlar doirasida qator istisnolar, kollizion normalar mavjud ekani ma’lum bo‘ldi. Avvalo, qonunning to‘g‘ridan to‘g‘ri ta’sir etish subyektlari ayrim moddalarda alkogol va tamaki moddalarini iste’mol qilishning zarari to‘g‘risida axborot tarqatish, iste’mol qilish va jalb qilishga imkon beruvchi sabablar va shart-sharoitlarni bartaraf etish bo‘yicha chora-tadbirlarning profilaktika ishlari faqatgina voyaga yetmaganlar o‘rtasida olib borish nazarda tutilgan. Boshqa moddalarda esa iste’mol qilishning zararli ta’siridan himoya qilish, bunday mahsulotlarni realizatsiya qilinishi va iste’mol jarayonlariga jalb qilinishini taqiqlovchi normalar 21 yoshga to‘lmaganlar uchun deb belgilab qo‘yilmoqda”, — dedi senator.

Ma’lum qilinishicha, qonun doirasida vujudga keladigan munosabatlarda (alkogol va tamaki mahsulotlarini iste’mol qilishi va jalb etilishida amalga oshiriladigan chora-tadbirlardan) 18 yoshdan yuqori va 21 yoshga to‘lmagan shaxslar qatlami chetda qolib ketyapti.

“Qonunda subyektlarni 18 yoshdan 21 yoshgacha ajratish, normalarni turlicha qo‘llash va talqin qilishga olib kelishi mumkin. Shu bois, ushbu normalarni qayta ko‘rib chiqish maqsadga muvofiq. Shuningdek, qonunda chekilmaydigan tamaki mahsulotlari qatorida “nosvoy” tushunchasining mazmuni xat boshida alohida ochib berilgan. Biroq, boshqa yangi turdagi chekilmaydigan tamaki mahsulotlari mazmuni ochib berilmagan. Ularning bir-birdan farqlari keltirilmagan. Shu bois, qonunning 3–4-moddalarida chekilmaydigan tamaki mahsulotlari tamakili va nikotinli snus tushunchalarini ochib berish maqsadga muvofiq. Ko‘rib turganingizdek, qonun ishlab chiqishda aholi, ayniqsa yoshlarning sog‘lig‘ini saqlashdek muhim maqsad bor. Lekin kamchiliklari mavjud bo‘lib, uning shundayligicha qabul qilinishi maqsadga muvofiq emas deb topildi”, — dedi Odiljon Eminov.

Shundan so‘ng, senatorlar mazkur qonunni rad etishni qo‘llab-quvatlab ovoz berdi va qonun rad etildi.