Lana Del Rey, Billi Aylish, Dua Lipa — bu xonandalarning ismlarini bugun millionlab odamlar biladi, ammo ularga dastlabki mashhurlikni qo‘shiqlari emas, aynan reklama olib kelgan. Quyida aynan shu haqda so‘z yuritamiz.

Lana Del Rey — Jaguar va H&M reklamalarida

Bugun Lana Del Rey musiqa sanoatining eng mashhur namoyondalaridan biri hisoblanadi. 2011-yilda uning ijodiy faoliyati endigina boshlangandi. O‘sha yili u YouTube platformasiga “Video Games” va “Blue Jeans” nomli havaskor kliplarini joylagan— aynan shu kliplar unga ilk muxlislarni olib kelgan.

Oradan bor-yo‘g‘i bir yil o‘tib, 2012-yil sentyabr oyida Jaguar nomli mashhur avtomobil brendi yangi avtomobilni taqdim etish uchun uni reklama kampaniyasiga taklif qiladi. Buning uchun Lana “Burning Desire” nomli qo‘shiqni yozadi va aynan shu qo‘shiq tufayli uni ilk bor “pop musiqa malikasi” deb atashadi.

Xuddi shu yili u H&M brendining kuz-qish kolleksiyasi yuzi bo‘ladi. Reklama roligida Lananing “Blue Velvet” qo‘shig‘iga qilgan kaveri yangraydi, videotasvir esa afsonaviy rejissyor Devid Linchning shu nomdagi filmiga ishora qiladi. Aynan shu reklama tufayli qo‘shiq yana bir bor mashhur bo‘ladi, Lana esa millionlab muxlislarning e’tirofiga sazovor bo‘ladi.

Feist (Lesli Fayst) — Apple reklamasida

Lesli Fayst Kanadadan tashqarida deyarli tanilmagan edi, ammo 2007-yilda u iPod Nano reklamasi fonida uning “1234” kompozitsiyasi yangradi. Bu rolik tufayli xonanda 73 mingta yuklab olishga erishadi va Billboard Hot 100 chartida 28-o‘rinni egallaydi.

Fayst mashhurligi global darajaga yetmagan bo‘lsa-da, “1234” va “The Remainder” qo‘shiqlari Apple reklamalari orqali ko‘pchilikka tanish bo‘lib qoldi. Shuningdek, xonanda 2008-yilda Fayst to‘rtta “Grammy” mukofotiga nomzod qilib ko‘rsatilgan.

Billi Aylish — Gucci va Apple reklamasida

Billi Aylishning musiqa karyerasi reklamadagi ishtirokidan ancha oldin boshlangan edi, ammo uning o‘zgacha musiqa uslubi va o‘zini o‘zgacha usulda taqdim qila olmasligi tufayli butun dunyoga mashhur emasdi. Apple va Gucci reklamalari esa unga kengroq auditoriyaga tanilish imkonini berdi. 2018-yilda u “Come Out and Play” nomli trekni chiqardi, bu qo‘shiq maxsus Apple’ning Yangi yil reklama kampaniyasi uchun yozilgan edi. Reklama har bir insonda yashirin iste’dod borligi va uni namoyon qilish uchun jur’at kerakligini ko‘rsatadi. Bu g‘oya Billi Aylishning shaxsiyati bilan aynan mos kelardi.

2021-yilga kelib, u allaqachon jahon miqyosida mashhur bo‘lganida, Apple uni yana bir loyiha uchun taklif qiladi. Kompaniya Billi Aylishning “Getting Older” va “Goldwing” singllari orqali o‘zining yangi audio funksiyasini targ‘ib qiladi.

2022-yilda esa noodatiy tashqi ko‘rinishga ega bo‘lgan Billi mashhur Gucci moda uyi bilan hamkorlik qiladi. 50-yillar uslubida ishlangan atmosferaviy reklamada Billi yangi quyoshdan saqlovchi ko‘zoynaklar kolleksiyasini reklama qiladi. Qiziq jihati shundaki, bu reklamada Billi Aylishning hech bir qo‘shig‘i ishlatilmagan, Gucci dunyoga aynan uning shaxsini taqdim etishni istagan.

Dua Lipa — Puma va Evian bilan hamkorliklar

Bugun Dua Lipa go‘zallik va moda timsoli sifatida tan olingan san’atkor. Bu darajadagi e’tirofga xonanda mashhur brendlar bilan qilgan reklama hamkorliklari orqali erishgan.

2017-yilda britaniyalik xonanda Patrizia Pepe brendining kuz-qish kolleksiyasini namoyish qilgan. 2020-yilda esa u sport brendi Puma’ning yuzi bo‘lib, ularning “She Moves Us” nomli ayollar kampaniyasida asosiy ishtirokchiga aylangan.

Bundan tashqari, Dua Lipa ikki marta Evian mineral suvining reklamalarida suratga tushgan. 2021-yilda “Drink True” roligida uning “Levitating” qo‘shig‘i yangragan. 2022-yilda esa u britaniyalik tennischi Emma Radukanu bilan birgalikda reklamada ishtirok etgan. Shu va boshqa reklamalar orqali Dua Lipa musiqadan tashqarida ham katta muxlislar bazasiga ega bo‘lgan va hozirda butun dunyoda moda trendlarini belgilab bermoqda.