Ko‘pchilik mashhurlar boylik va mustaqil hayot timsoli sifatida tasavvur qilinadi. Ammo ba’zilarining hayot yo‘li buning aksini ko‘rsatadi. Kimdir pulni tejashni, kimdir esa oilaviy iliqlikni afzal ko‘rib, voyaga yetganiga qaramay ota-onasi bilan yashashda davom etadi. Garchi ota-ona bilan doimiy yashash sharq mamlakatlari xalqi uchun odatiy hol bo‘lsa-da, g‘arbda bunga o‘zgacha nigoh bilan qaraladi. Quyida yaqin qarindoshlari bilan uzoq vaqt birga yashashni tanlagan mashhurlar haqida so‘z yuritamiz.
Maykl B. Jordan
Mashhurligiga qaramay, Maykl B. Jordan ota-onasi bilan 32 yoshigacha yashagan va bu haqida ochiqchasiga gapirishdan uyalmagan. Uning muxlislari aktyorni ota-ona qaramog‘idan chiqib keta olmaydigan, ularga haddan tashqari bog‘lanib qolgan, deb hisoblagan. Kunlarning birida Jordan Opra Uinfri shousiga onasi, xolasi, amakisi va hatto jiyanlari bilan birga tashrif buyurgan. Maykl hech tortinmasdan ularni tomoshabinlarga tanishtirgan.
Zendaya
Zendayaning yaqinlari aytishicha, u 21 yoshigacha ota-onasining uyidan ketishga jur’at etmagan. Voyaga yetganiga qadar ham u mustaqillikka shoshilgan isyonkor o‘smir bo‘lmagan. Aktrisa ota-onasi bilan yashashining bir necha sababini quyidagicha tushuntirgan: bu pulni tejash, yaqinlar yordamidan foydalanish va qulaylik hissi edi.
“Bilasizmi, ota-ona bilan yashash menga tinchlik va osoyishtalik hissini beradi. Ular doim menga har ishda yordam beradi: tongda uyg‘otishadi, ish joyigacha bepul olib borib qo‘yishadi, mazali ovqatlar tayyorlab berishadi. Shunday ekan, uydan alohida chiqib ketishimdan ne ma’no?”, degan edi aktrisa intervyulardan birida.
Teylor Lotner
Teylor Lotnerni mustaqil bo‘lishga va ota-onasidan alohida yashashga faqatgina oila qurish istagi majbur qilgan. Aktyor “Sumerki” filmida suratga tushish chog‘ida ham ota-onasidan alohida yashash kerak deb hisoblamagan. Bu vaqtda u bor vaqtini faqat karyerasiga bag‘ishlagan. Atrofdagilar uning shunchaki pulni tejayotganini, ijaraga mablag‘ sarflashni istamaganini va bankda jamg‘arib borayotganini aytgan. Aktyorning o‘zi esa bunday turmush tarzi unga yoqishini bildirgan. Masalan, u onasiga gazon o‘rishga yordam beradi va boshqa uy yumushlarini ham oilasi bilan bajaradi.
“Men bog‘dagi ishlarni bajaraman, axlat tashlayman va idish-tovoq ham yuvaveraman”, deydi aktyor.
Jennifer Lourens
Jennifer Lourensning hayotida ham shunga o‘xshash holat kuzatilgan. Aktrisa to‘yiga qadar ota-onasi bilan yashagan. Muxlislar hayron bo‘lishar edi: “Hayot-mamot o‘yinlari” uchun olgan ulkan gonorarlar unga shaxsiy uy sotib olishga yetmayaptimi? Biroq haqiqat boshqacha bo‘lib chiqdi. Lourens o‘zi va ota-onasi uchun umumiy uy sotib olgan, chunki katta hovlida yolg‘iz yashashni befoyda va noqulay deb hisoblaydi:
“Men bunchalik ko‘p xonalari bo‘lgan uyda yolg‘iz yashab nima qilaman? Har kuni har xil xonada uxlashim kerakmi?”, degan edi u intervyuda kulib.
Kim Kardashyan
O‘zining mustaqilligi va katta daromadlariga qaramay, Kim Kardashyan ham voyaga yetganida vaqtincha ota-onasi uyiga qaytishga qarshi bo‘lmagan. Uning qizi tug‘ilgandan keyin Kardashyan ota uyiga ko‘chib o‘tgan.
Izoh (0)