Britaniya qirollik oilasi a’zolari doimiy ravishda jamoatchilik diqqat markazida bo‘ladi. Eng sinchkov kuzatuvchilar ayrim qirollik a’zolari ba’zida xavfsizlik qoidalariga amal qilmasligini payqagan. Garchi qonun barchaga teng bo‘lsa-da, shahzoda Uilyam va malika Keytning xavfsizlik kamarini taqmasligiga bir qator sabablar mavjud.
Qonunda bir nechta istisnolar bor: ulardan birida aytilishicha, agar “qirollik oilasi a’zosi toj tomonidan yoki toj nomidan tashkil etilgan tantanali yurish va shu kabi marosimda ishtirok etsa, u holda xavfsizlik kamarini taqmaslikka ruxsat etiladi”.
Hatto Uels shahzodasi va malikasi rasmiy marosimda qatnashmayotgan paytda ham, ular ko‘pincha politsiyachilar yoki shaxsiy xavfsizlik xodimlari hamrohligidagi rasmiy avtokortej tarkibida bo‘ladi. Qonun nuqtayi nazaridan, bu ham “marosim” sifatida baholanishi mumkin.
Masalan, o‘tgan yozda shahzoda Jorj, malika Sharlotta va shahzoda Lui Bukingem saroyiga kelgan va ular xavfsizlik kamarisiz suratga olingan edi. Qirollik farzandlarining kelishini hamroh bo‘lgan mashinalar tufayli toj marosimiy yurish deb hisoblash mumkin. Bu xavfsizlik nuqtayi nazaridan ham amalga oshirilgan bo‘lishi mumkin.
Qirollik qo‘riqchilari fikricha, bu kabi qarorlar har bir holatga qarab alohida qabul qilinadi. “Har doim kutilmagan holatlar bo‘lishi mumkin”, deydi xavfsizlik xodimlari boshlig‘i. Ular turli tahdid va xavf darajasini hisobga olgan holda, har bir vaziyatni alohida tahlil qilishadi.
Uning so‘zlariga ko‘ra, ba’zi holatlarda transport vositasidan tezda tushish yoki chiqish zarur bo‘ladi, shuning uchun xavfsizlik kamari taqilmagan bo‘lishi mumkin. Bu esa favqulodda holatda ularni mashinadan tez evakuatsiyani tashkil etishda yordam beradi.
Bunday qarorlarda shaxsiy xohishlar, vaziyatning o‘ziga xosligi va tashqi ko‘rinish ham hisobga olinadi. Bunga yorqin misol qirollik to‘ylari bo‘lishi mumkin. Xavfsizlik kamarlari kelin-kuyovning bayramona kiyimlarini bekitib qo‘yadi va suratlari chiroyli chiqmaydi. Qolaversa, kortej sekin harakatlanadi, shunda xalq qirollik a’zolarini to‘liq ko‘rishi va tabriklashi uchun vaqt bo‘ladi. Bunday holatda xavfsizlik kamari hech qanday foyda bermaydi.
Shubhasiz, shahzoda Uilyam va Keyt ko‘pchilik uchun ibrat bo‘lishsa-da, bu masalada ularga taqlid qilish to‘g‘ri emas. Ular ba’zida yo‘l harakati xavfsizligi qoidalarini buzishga majbur qiluvchi holatlarda bo‘lishadi. Shunga qaramay, oddiy kundalik safarlarda, ayniqsa, shahar tashqarisidagi uylarga borganda yoki sayohat qilganda, ular odatda xavfsizlik kamarini albatta taqishadi.
Izoh (0)