Billi Aylish, Keti Perri, Sem Smit va boshqa 200 dan ortiq jahonga mashhur san’atkorlar musiqa yaratishda sun’iy intellektdan foydalanishga qarshi ochiq xat imzoladi. Bu haqda “Pravila jizni” xabar bermoqda.
Yulduzlarning fikricha, qo‘shiq yaratishda neyrotarmoqlardan foydalanish etika qoidalariga zid bo‘lib, sun’iy intellekt butun musiqa ekotizimini buzadi, ijodiy mehnatni qadrsizlantiradi, natijada san’atkor va muxlislar haq-huquqlarini poymol qiladi.
Shunday qilib, ochiq xat imzolagan yulduzlar ularning huquqlarini himoya qiluvchi Artist Rights Alliance (ARA) notijorat tashkiloti tashabbusiga qo‘shildi.
Shuningdek, xatda mualliflarga gonorar to‘lamaslik uchun biror san’atkor ijodiga o‘xshash kuy va qo‘shiqlar yaratilishiga ham qarshi fikrlar bildirilgan.
“Biz barcha raqamli musiqa platformalari va xizmatlarini qo‘shiq mualliflari va san’atkorlar mehnatiga putur yetkazadigan yoki uning o‘rnini bosadigan sun’iy intellekt asosidagi texnologiyalar, kontent va musiqa yaratish vositalarini ishlab chiqmaslikka da’vat etamiz”, — deyiladi maktubda.
Mazkur tashabbusni xonandalardan Stivi Uander, Jon Bon Jovi, Rayan Tedder (One Republic), Zayn Malik, Billi Aylishning ukasi Finnes, guruhlardan Pearl Jam, Imagine Dragons, Jonas Brothers kabilar qo‘llab-quvvatladi.
Izoh (0)