Ko‘pchilik Jeki Channi hazilkash, chaqqon va har qanday vaziyatni kulgiga aylantira oladigan aktyor sifatida taniydi. Uning aksariyat filmlari tomoshabinni quvontiradi, kuldiradi va zavqlantiradi. Biroq aktyorlik va kaskadyorlik mahorati bilan tan olingan Jeki Chan tomoshabinni yig‘latishga ham qodir. Uning filmografiyasida butunlay boshqacha — jiddiy, dramatik, ko‘z yoshlarni tiya olmaydigan rollar ham mavjud.
“Muhojir” (2017)
Filmning bosh qahramoni Tsyuan Vyetnam urushi faxriysi bo‘lib, Londonning janubiy hududda restoran ochadi va faxr bilan qizi qanday qilib go‘zal va yosh ayolga aylanishini kuzatadi. Uning tinch hayoti qizining terrorchilik hujumida halok bo‘lishi bilan izdan chiqadi. Politsiya harakatlaridan norozi bo‘lgan Min adolatni o‘zi tiklashga qaror qiladi. Uning izlanishlari uni Shimoliy Irlandiya siyosatchisi, sobiq IRA a’zosi Liam Xennessiga (Pirs Brosnan) olib boradi. Min o‘zining harbiy tajribasidan foydalanib, qizining o‘limida aybdorlarni topishga harakat qiladi. Jeki Chan bu safar superqahramon, kulgu ustasi emas, balki singan odam obrazida namoyon bo‘lgan.
“Sindzyuku voqeasi” (2009)
“Sindzyuku voqeasi” dramatik trilleri aktyorning odatdagi komedik rollaridan keskin farq qiladi. Filmda u Yaponiyada yashayotgan xitoylik muhojirning murakkab va fojeali hayotini tasvirlaydi.
Film voqealari 1990-yillarda Tokioda sodir bo‘ladi. Asosiy qahramon — Tetsuo (Jeki Chan), Xitoydan Yaponiyaga kelgan muhojir bo‘lib, u yo‘qolgan sevgilisi Syu Syu (Syu Tszinley)ni izlab keladi. Ammo Syu Syu endi yaponiyalik yakuza boshlig‘i bilan turmush qurgan. Tetsuo esa yashash uchun jinoyat dunyosiga kirib, yakuza guruhlariga qarshi kurash olib boradi. Bu filmda Chan murakkab xarakterli qahramonni ijro eta olishini kuchli aktyorlik bilan namoyon qiladi.
“So‘nggi imperiyaning qulashi” (2011)
Bu tarixiy filmda Jeki Chan faqat aktyor emas, balki rejissyor sifatida ham o‘zini namoyon etgan. Film Xitoy tarixidagi eng muhim voqealardan biri — Sinxay inqilobi haqida. Asosiy e’tibor Xitoyda monarxiyaning tugashi va respublika tuzumining o‘rnatilishi jarayoniga qaratilgan.
Chan obrazi — general Xuang Sin, mamlakat kelajagi uchun kurashayotgan inqilobchi. Syujetga ko‘ra, Xitoy aholisining og‘ir sharoitda yashashi, korrupsiya, chet el bosqinchiligi va Tsing sulolasi hukmronligiga qarshi noroziliklar kuchayib boradi. Inqilobchilar yetakchisi Sun Yatsen boshchiligida respublikachilar Tsing sulolasiga qarshi kurash boshlaydi.
Izoh (0)