Aksariyat hollarda aktyorlar ijro etgan obrazi ularning real hayotiga aloqador bo‘lmaydi, ammo bugungi qahramonlarimiz istisnodir. Quyida ekranlarda mard, jasur va oliyjanob rollarda tasvirlangan, hayotda esa bunda-da ajoyib inson bo‘lgan kinoyulduzlarni sanab o‘tamiz.
Bryus Li
Bryus Li aktyorlik faoliyatini bolalikdan boshlagan.Otasi Bryusni Gonkong kinosi bilan yaqindan tanishtirgan. AQSHga ko‘chib kelgandan so‘ng, Bryus filmlarda rol ijro etishni boshladi, ammo aktyor irqqa oid stereotiplarga duch keldi. Chunki Gollivudda osiyoliklar odatda zaif, hammaga moslashgan va oddiy ishchi yoki xizmatkor sifatida tasvirlangan. Ip Man yordamida egallagan jang san’ati yordamida Bryus jangovar filmlarda kuchli, chaqqon va epchil qahramonlarni o‘ynay boshladi. Aynan Bryus Li tufayli yillar davomida yangi stereotip paydo bo‘ldi. Endi insonlarda “barcha osiyoliklar jang san’atidan xabardor” degan fikr paydo bo‘ldi.
Jan-Klod Van Damm
Bolaligida Jan-Klod ozg‘in va kasalmand bola edi. Shuning uchun otasi 10 yoshli o‘g‘lini karatega beradi. Bola bor vujudi bilan mashq qila boshlaydi, shu bilan birga bodibilding bilan ham shug‘ullanadi. 18 yoshida bo‘lajak aktyor karate bo‘yicha qora belbog‘ oladi va bodibildingda “Janob Belgiya” unvonini qo‘lga kiritadi. 1979-yilda Van Damm “It va bo‘ri orasidagi ayol” filmida debyut qiladi. 20 yoshida esa u allaqachon sport zali ochishga, uni Bryusselda eng yaxshisiga aylantirishga, bir necha yilga yetadigan mo‘may daromad qilishga ulguradi. Keyinroq AQSHga aktyor bo‘lish uchun ko‘chib ketadi va u yerda Chak Norris bilan uchrashadi. Bryus Li singari, Jan-Klod Van Damm asosan jangovar filmlarda o‘ynagan. “Kikbokschi”, “Ikki karra zarba”, “Qonli sport” kabi ko‘plab filmlarda ishtirok etgan.
Jeki Chan
Jahon kinosining tirik afsonasi, gonkonglik Jeki Chan uchun 90-yillarning oxiri va 2000-yillarda aktyorlik faoliyatining faol davri bo‘ldi. Gollivudning “Tig‘iz vaqt”, “Shanxaylik shovvozlar” kabi filmlaridagi obrazidan ko‘ngli to‘lmagach, o‘zining prodyuserlik kompaniyasiga asos soldi va asosiy e’tiborni Gonkong kinosiga qaratdi. Jeki Chan muxlislari aktyorning kinodagi qahramoni bilan birlashib ketgan ajoyib xarakteri uchun yaxshi ko‘radi. Jeki Chan yuzlab jarohatlar olgani va bir nechta operatsiyalarni boshidan o‘tkazganiga qaramay, ijod yo‘lida davom etishi barchani hayratga soladi.
Chak Norris
Chak Norris 1968-yilda ilk bor ekranlarda ko‘ringan bo‘lsa-da, aynan 70-yillarda kino sanoatidagi faoliyatiga jiddiy e’tibor bergan. Chak Norris deganda yuzlab dushmanlari bilan yakka holda kurasha oladigan qudratli inson qiyofasi ko‘z oldimizga keladi. Haqiqiy hayotda ham u obrazlari kabi ko‘plab muvaffaqiyatlarga erishgan. Maktabni tugatgach, karate bo‘yicha og‘ir vazn toifasida Jahon chempioniga aylanadi va dzyudo bo‘yicha qora belbog‘ga ega chiqadi. Norris kinoda aktyor bo‘lib emas, balki kaskadyorlar murabbiysi sifatida ish boshlagan. U “Izsiz yo‘qolganlar”, “Oktagon”, “Unsiz g‘azab”, “Majburiy qasos” va boshqa ko‘plab filmlarda suratga tushgan.
Mark Uolberg
Mark Uolberg ekranda xavfli va qo‘pol erkak obrazini gavdalantirganda uning rol o‘ynashiga hojat ham qolmaydi. U xavf-xatarlarga to‘la notinch bolalikni boshdan o‘tkazgan. 80-yillarning oxirida o‘spirin Mark bir nechta insonga hujum uyushtirgan payti aktyorlik haqida o‘ylab ham ko‘rmagandi. 1988-yilda u vyetnamlik shaxsga hujum qilgani uchun qamoqqa olingan. Uolberg tez orada ozodlikka chiqdi va o‘tmishni unutib, musiqa yaratishni boshladi. Shu tariqa Mark kino sanoatiga ham kirib keldi va Gollivudda o‘z o‘rniga ega bo‘ldi.
Kianu Rivz
Kianu Rivz katta kinodagi faoliyatini “Bill va Tedning ajoyib sarguzashtlari” filmi bilan boshlagan, shundan so‘ng “To‘lqinlarni bo‘ysundirib”, “Tezlik”, “Iblis himoyachisi”, “Matritsa”, “Konstantin: zulmat hukmdori” va “Jon Uik” filmlarida rol o‘ynagan. Bu filmlarning barchasini butun dunyo bo‘ylab millionlab odamlar tomosha qilgan, ammo Kianu bundan hech qachon kibrlanib ketmagan. U bir necha o‘nlab kilometr yo‘l bosib, mushkul ahvolda qolgan notanish odamni uyiga olib borishi mumkin, kasalxonalarga pul xayriya qiladi, u hech qachon oddiy odamlarga past nazar bilan qaramaydi. Metroda yuradi va muxlislari bilan doim do‘stona munosabatda bo‘ladi. Shon-shuhrat va boylik Kianuni buzolmadi, balki unga yanada xayrli ishlarni qilish imkoniyatini berdi.
Stiv Bushemi
Stiv Bushemi “Quturgan itlar” va “Fargo” filmlarida jinoyatchi rollarini, “Sopranolar” va “Yerosti imperiyasi” teleseriallarida bosh rollarni ijro etgan. Mashhurlikka erishishdan avval Stiv 1980-yildan 1984-yilgacha Nyu Yorkda besh yil davomida o‘t o‘chiruvchi bo‘lib ishlagan. Oradan 17 yil o‘tgach, AQSHda sodir bo‘lgan va butun dunyoni larzaga keltirgan11-sentyabr voqealarida mashhur aktyor o‘t o‘chiruvchi formasini kiyib, vayronalarda qolgan insonlarni qutqarishga ketgan. U har safar hayotini xavf ostiga qo‘yib, bir hafta, kuniga 12 soat davomida shunday ishladi.
Izoh (0)