Tomoshabinlarga film va seriallarda suratga tushish chetdan nazar solganda mushkul bo‘lmagan jarayondek tuyuladi. Grimchilar aktyor atrofida aylanib, tashqi ko‘rinishini to‘g‘rilab qo‘yadi, keyin esa uning iste’dodiga qoyil qolish navbati operator va rejissyorga keladi. Ammo bularning ortida katta mehnat, turli jismoniy va ruhiy qiyinchiliklar turganini unutib qo‘yamiz. Ayniqsa jangari filmlar syomkasi ko‘plab aktyorlar hayotiga xavf solishi va turli jarohatlar olib kelishi mumkin. Quyida jiddiy jarohat olgan mashhur aktyor va aktrisalar haqida so‘z boradi.
Sharliz Teron
2005-yilda suratga olingan “Eon Flaks” filmi aktrisa Sharliz Teron uchun so‘nggi loyiha bo‘lishi mumkin edi. U orqaga qarab salto bajarayotgan vaqtda bo‘yni bilan yiqilib tushgan. Tibbiy ko‘rikda Sharliz falaj bo‘lishiga bir baxya qolganini shifokorlar ta’kidlagan. Aktrisaning omadi kelib, yiqilish xavfli bo‘lmagan.
Jorj Kluni
2005-yil 23-noyabrda premyerasi bo‘lib o‘tgan “Siriana” siyosiy trilleri Jorj Kluniga “Oskar” mukofoti bilan birga bosh miya jarohatini ham keltirdi. Filmda aktyor stulga bog‘lab qo‘yilgan sahna bor edi. Jorj stul bilan birga tasodifan orqaga ag‘darilib ketgan. O‘sha kuni yulduz shifokor ko‘rigiga borish zarur deb hisoblangan, ammo ko‘p o‘tmay Jorjni to‘xtovsiz bosh og‘riqlari bezovta qila boshlagan. Bir qator tibbiy tekshiruvlardan keyin shifokorlar Kluni miyani himoya qiluvchi membranani shikastlab, miya bosh suyagiga juda yaqin turib qolganini aniqlagan.
Jeki Chan
Aktyor va kaskadyor Jeki Chan deyarli barcha suyaklarini sindirib olgani haqida ko‘p ta’kidlagan, ammo bir jarohat uning umriga zomin bo‘lishi mumkin edi. 1991-yilda Yugoslaviyada suratga olingan “Mo‘jizaviy aslahalar” filmida aktyor devordan daraxt shoxiga sakrashi lozim edi. Birinchi dublda Jeki buni uddaladi, ammo ikkinchi dublda u boshi bilan toshga yiqildi va zudlik bilan kasalxonaga olib borildi. Muvaffaqiyatli kechgan operatsiyadan so‘ng Jeki Chan yana suratga olish ishlariga sho‘ng‘ib ketdi.
Tom Henks
Aktyor Tom Henks bosh rolni ijro etgan “Odamlardan yiroqda” filmi inson qadami yetmagan Monuriki orolida bo‘lib o‘tgan. Suratga olish jarayonida aktyor biroz oyog‘idan lat yeydi va kichik jarohatga parvo qilmaydi. Ikki hafta o‘tgach oyoqdagi jarohat qayta qonayverishi va og‘riqlar kuchayib borgani sababli Tom tibbiy yordamga murojaat qildi. Shifoxonada aniqlanishicha, aktyorda stafilokokk infeksiyasi rivojlanib, uni sekin-asta yemirib borayotgan bo‘lgan. O‘z vaqtida amalga oshirilgan tibbiy muolajalar aktyor tuzalib ketishiga sabab bo‘lgan.
Brendon Li
“Qarg‘a” filmi otasi Bryus Li kabi Brendonga ham ulkan muvaffaqiyat keltirishi kutilmoqda edi. Biroq suratga olish maydonchasida baxtsiz hodisa yuz beradi va yosh aktyor to‘satdan vafot etadi. Aktyor o‘limiga bo‘sh patronlar va pistolet ichki qismida qolib ketgan tiqin bilan qoringa otilgan o‘q sabab bo‘ldi. Tiqin umurtqa pog‘onasiga yetib borgan va o‘tkir qon ketishiga sabab bo‘lgan.
Izoh (0)