Butun dunyoga sharmanda qilgan: Gollivud yulduzlarining “quloqsiz” farzandlari

Mashhur insonlar xalq e’tiborida ekan, ular doimo o‘z obro‘si va sha’ni haqida qayg‘urib keladi. Biroq ularning sa’y-harakatlariga qaramay, ba’zan yulduzlarning hurmat-e’tiboriga ularning farzandlari putur yetkazadi. “RBK-Ukraina” nashri farzandlari tufayli Gollivud va butun dunyo oldida qizarishga majbur qilgan yulduzlarni sanab o‘tdi.

Maykl Duglas va uning o‘g‘li Kemeron

2009-yilda Maykl Duglasning o‘g‘li Kemeron Duglas giyohvand moddalar savdosi bilan shug‘ullangani uchun 7 yilga qamaldi. Uning tibbiy ma’lumotnomasida qayd etilgan manbalarga ko‘ra, Kemeron 13 yoshidan boshlab giyohvand moddalarni iste’mol qilgan, 20 yoshida geroin iste’moliga o‘tgan va 25 yoshida hibsga olingan paytda kuniga 5-6 marta ukol olmasdan turolmaydigan giyohvandga aylangan.

“O‘g‘lim meni xalq oldida uyaltirdi. Fikrimcha, qamoqxona uning uchun eng yaxshi joy. Kemeron hayotini qayta mulohaza qilib, barchasini boshidan boshlashiga ishonaman”, — deydi aktyor. 2016-yilda Kemeron ozodlikka chiqdi.

Jeki Chan va uning o‘g‘li Jeysi

Yuqoridagi voqealarga o‘xshash holat tirik afsona — mashhur Jeki Chan oilasida sodir bo‘ldi. 2014-yilda Xitoy huquq-tartibot idoralari giyohvandlikka qarshi reyd o‘tkazganda Jeki Channing o‘g‘li giyohvand moddalar iste’molida ayblanib, hibsga olindi.

Uning kvartirasida taqiqlangan moddalar savdosi va iste’moli bilan shug‘ullangan boshqa shaxslar ham bor edi. Sud uni olti oyga ozodlikdan mahrum qildi.

Kichik Robert Dauni va uning o‘g‘li Indio

Ma’lumki, aktyor Kichik Robert Daunining o‘tmishi ancha og‘ir kechgan. Uning otasi ham aktyor bo‘lgan, Robert esa bolaligidan giyohvand moddalarga qaramlikka duchor bo‘lgan.

U ilk marta 8 yoshida taqiqlangan moddalarni tatib ko‘rgan va yillar davomida giyohvand moddalarga qaramlikdan aziyat chekkan. Bunday moddalarni uyda saqlash va reabilitatsiya markazlarida davolanish kabi voqealardan so‘ng Robert hibsga olingan. Ammo aktyor kasallik ustidan g‘alaba qozonib, kino sanoatida ish boshlagan.

Afsuski, uning o‘g‘li ham huddi shunday taqdirni boshidan kechirdi. Indio ham giyohvand moddalar saqlagani uchun hibsga olindi.

Tom Henks va uning o‘g‘li Chester

2015-yilning bahorida aktyor Tom Henksning o‘g‘li mehmonxonada janjal ko‘tarib, atrofidagi barcha predmetlarni uloqtirgan va xonalarni vayron qilgan. Uning qilmishi mehmonxonaga 1800 dollar zarar yetkazgan. Oradan bir necha oy o‘tib, 25 yoshli Chester birdan g‘oyib bo‘ldi va bir oy davomida uyga qaytmadi.

Tom Henks o‘g‘lini topish uchun xususiy detektivlarni yolladi. Ammo Chesterning o‘zi uyga qaytib keldi. Ma’lum bo‘lishicha, Tom Henksning o‘g‘li reabilitatsiya klinikasida giyohvandlikka qaramlikdan davolangan va buni ota-onasidan yashirgan.

Nikolas Keyj va uning o‘g‘li Veston

2011-yilda mashhur aktyor Nikolas Keyjning o‘g‘li Los-Anjelesdagi restoranlardan birida treneri bilan janjallashib qolgan, chunki u Vestonning qomatiga zarar yetkazadigan taomlarni buyurtma qilishni taqiqlagan.

Veston jahlini tiyolmay, o‘z treneriga qo‘l ko‘targan va mushtlashuv boshlanib ketgan. Atrofdagilar ularni tinchlantira olmagach, ruhiy salomatlik xizmatlarini chaqirishga to‘g‘ri kelgan. Voqea joyiga yetib kelgan shifokorlar Nikolas Keyjning tajovuzkor o‘g‘lini o‘zlari bilan olib ketishgan.