Toshkent shahridagi kafelarning biridan mast holda chiqqan va mashina o‘g‘irlashda gumonlangan sudyaning vakolati muddatidan avval tugatilgani xabar berilgandi. Endilikda unga nisbatan jinoyat ishi qo‘zg‘atilgan. Bu haqda jamoatchilikka Inson huquqlari faoli Abdurahmon Tashanov xabar berdi.
Mazkur xabarni “Daryo”ga tasdiqlagan Toshkent shahar prokuraturasi axborot xizmatiga ko‘ra, sobiq sudya transport vositasini olib qochishda gumonlanmoqda.
“Daryo” manbasi sudya Rustam Rahmonovning qilmishi yuzasidan o‘tkazilgan xizmat tekshiruvi yakuniga ko‘ra, u Sudyalar odobi kodeksi talablarini buzgani uchun qolaversa, uning arizasiga binoan vakolati muddatidan avval tugatilganini maʼlum qilgandi. Manba shuningdek, o‘sha kuni sobiq sudya Rahmonovning yonida bo‘lgan ikki nafar sudyaga nisbatan ham xizmat tekshiruvi tayinlanganini ochiqlagandi. Sudyalar oliy kengashi axborot xizmati bu bo‘yicha aniqlanadigan holatlar borligini aytib, keyinchalik batafsil maʼlumot berilishini qo‘shimcha qildi.
2025-yilning 21-aprel kuni ijtimoiy tarmoqlarda poytaxtdagi kafelarning biridan mast holda chiqqan Mirobod tuman sudi sudyasi mashina o‘g‘irlaganlikda gumonlanayotgani xabar berilgan edi. Ushbu xabarga munosabat bildirgan Sudyalar oliy kengashi gap kim haqida ketayotganiga qisman aniqlik kiritdi.
“Sudyalar odobi kodeksi talablaridan kelib chiqib, Toshkent shahar jinoyat ishlari bo‘yicha Mirobod tuman sudi sudyasining xizmatdan tashqari vaqtdagi xatti-harakatlari yuzasidan xizmat tekshiruvi o‘tkazilmoqda. Ijtimoiy tarmoqlardagi shu mavzuga doir xabarlarda tilga olinayotgan holatlarga xizmat tekshiruvi jarayonida aniqlik kiritiladi va yakuni bo‘yicha lozim choralar ko‘rilishi taʼminlanadi”, deyilgandi kengash bayonotida.
“Kun.uz” sayti o‘z manbalariga tayanib, huquqbuzarlikda gumonlanayotgan sudya Mirobod tuman sudi sudyasi lavozimida bo‘lishining navbatdagi 10-yillik muddatiga tayinlangan Rustam Rahmonov ekanini aniqlashtirdi.
Keyinchalik “Daryo”ning huquqni muhofaza qiluvchi organlarida ishlovchi, Rahmonovga yaqin insonlardan biri voqea sodir bo‘lgan kuni sudya Yashnobod tuman IIB binosiga olib ketilganini va bir kun ushlab turilganini maʼlum qildi.
“Daryo” sudya Rustam Rahmonov bilan ham bog‘lanishga urindi. Sudya telefon qo‘ng‘iroqlariga javob bermadi. Qolaversa, Telegram orqali yo‘llangan savollarni ham ochiq qoldirdi.
Maʼlumot uchun: Jinoyat kodeksining 267-moddasiga ko‘ra, avtomobil o‘g‘irlagan shaxslar 20-yilgacha ozodlikdan mahrum qilish bilan jazolanishi mumkin.
Izoh (0)