Belarus prezidenti Aleksandr Lukashenko hokimiyatda “biroz ushlanib qolgani” sababini yangi avlod rahbarlarini tayyorlash bilan bog‘ladi. Bu haqda u Minskdagi Xalqaro ko‘rgazma markazining ochilish marosimida aytdi.
Sizlarga va’da berganim kabi: amalda yangi avlod hokimiyatga keltirildi. Ammo men biroz ushlanib qoldim, lekin sabr qilinglar, axir tajribali odamlar ham bo‘lishi kerak, dedi prezident.
Lukashenko fuqarolar o‘z ish joylarida burchlarini ado etishi lozimligini aytdi. Siyosatchining aytishicha, u “o‘z masalalari” bilan shug‘ullanadi, hukumat iqtisodiy muammolarni hal qiladi, prezident administratsiyasi esa diplomatiya bilan mashg‘ul bo‘ladi. U “bu tizim uzilishlarsiz ishlashi shart”, deya ta’kidladi.
Hozirda Lukashenkoning yettinchi prezidentlik muddati davom etmoqda, u 1994-yildan buyon Belarus rahbari hisoblanadi. 2004-yilda mamlakatda o‘tkazilgan referendum natijasida konstitutsiyadan davlat rahbari lavozimini ketma-ket ikki muddatdan ortiq egallash imkoniyatini cheklovchi modda chiqarib tashlangan.
2020-yilda Belarusda prezidentlik saylovlaridan keyin ommaviy norozilik namoyishlari boshlangan, ularning ishtirokchilari Lukashenkoning g‘alabasini tan olishdan bosh tortgan. Minglab namoyishchilar va xavfsizlik kuchlari to‘qnashgan, bir necha kishi halok bo‘lgan.
Bu aksiyalar korxonalarga ham tarqalgan, namoyishlar mamlakat yalpi ichki mahsulotining 27 foizini tashkil etuvchi kamida 30 ta yirik korxonaga ta’sir ko‘rsatgan.
Hukumat keng ko‘lamli noroziliklarga ommaviy qatag‘onlar bilan javob bergan, deyiladi BMT Inson huquqlari bo‘yicha Oliy komissari boshqarmasi hisobotida.
O‘sha saylovda bloger Sergey Tixanovskiy, bankir Viktor Babariko va tadbirkor Valeriy Sepkalo o‘z nomzodini qo‘ymoqchi edi. Uchalasi ham hibsga olingan, Tixanovskiy o‘rniga uning rafiqasi Svetlana Tixanovskaya saylovda qatnashgan.
Belarus Markaziy saylov komissiyasi ma’lumotlariga ko‘ra, Lukashenko 80,1 foiz (4,66 mln) ovoz, Tixanovskaya esa 10,12 foiz (588,6 ming) ovoz olgan.
Izoh (0)