O‘zbekiston va Saudiya Arabistoni o‘zaro turistlar oqimini 100 ming kishiga yetkazmoqchi

O‘zbekiston Vazirlar Mahkamasining 2022-yil 13-iyundagi topshirig‘iga binoan Turizm va madaniy meros vazirligi va Saudiya Аrabistoni Qirolligi Turizm vazirligi o‘rtasida turizm sohasida hamkorlik to‘g‘risida o‘zaro anglashinuv memorandumi imzolandi. Bu haqda vazirlik axborot xizmati xabar berdi.

Turizm sohasida o‘zaro foydali hamkorlik va do‘stona aloqalarni qo‘llab-quvvatlashga, tenglik, o‘zaro hurmat tamoyillariga asoslangan mazkur memorandumda quyidagilarga kelishib olindi:

• o‘zaro turistlar oqimini 100 ming kishiga yetkazish;
• turistlarni jalb qilish uchun o‘zaro madaniy, sivilizatsion va tarixiy me’rosdan foydalanishga targ‘ib qilish;
• mavjud turistik yo‘nalishlarni yanada rivojlantirish va yangi turistik yo‘nalishlarni ochish bo‘yicha o‘zaro kelishilgan chora-tadbirlarni amalga oshirish, guruh va individual turizmning har xil turlarini kengaytirish;
• tabiiy resurslar va madaniy boyliklarni turistik diqqatga sazovor joylar sifatida saqlash;
• mehmonxona, turistik kurortlar va turistlarni joylashtirish obyektlarini ularning samaradorligini tekshirish mexanizmlarini faollashtirish bilan boshqarish;
• turistik tadbirlar va safarlar tashkillashtirish;
• turizmni rivojlantirish uchun investitsiyalar kiritish;
• kichik va o‘rta turistik tashkilotlarni, turistik saytlarni rivojlantirish.

Shuningdek, hujjatga ko‘ra tomonlar OАVda chop etilgan maqolalar, filmlar va turistik eksponatlarni o‘zaro almashadi. Ekspertlar va turizmga ixtisoslashgan OАV vakillari uchun o‘zaro sayohatlar tashkillashtiriladi. Memorandumda qo‘shma turistik faoliyatni tashkil etish, har ikki davlatda tashkil etiladigan ko‘rgazma, konferensiya va simpoziumlarda qatnashish ham ko‘zda tutilgan.

Qolaversa, quyidagi jabhalarda ham izchil hamkorlik yo‘lga qo‘yildi:

• turizmga ixtisoslashgan ta’lim muassasalarini tashkil etish;
• turizm sohasida o‘zaro mutaxassislar almashish;
• turizmga oid xalqaro forumlarda o‘zaro hamkorlik qilish va bir-birini qo‘llab-quvvatlash.

Mazkur memorandum O‘zbekiston va Saudiya Arabistoni Qirolligi o‘rtasida turizm sohasidagi munosabatlarning yanada rivojlanishiga xizmat qiladi. Turizm va madaniy meros vazirligi tomonidan bundan avval Turkmaniston, Ozarbayjon, Isroil, Tojikiston va boshqa davlatlar bilan ham turizm sohasida turli kelishuvlar imzolangan.