8-iyul kuni “O‘zbekturizm” milliy kompaniyasi binosida “O‘zbekiston” yo‘lko‘rsatkichi elektron variantining namoyishi bo‘lib o‘tdi, deb xabar bermoqda “O‘zbekturizm” matbuot xizmati.
Yo‘lko‘rsatkich “Rus gidi. Poliglot” nashr seriyasi doirasida Marakanda Expedition kompaniyasining buyurtmasi bo‘yicha “Ayaks-Press” bilan hamkorlikda nashr qilinishi rejalashtirilmoqda va asosan Rossiya sayyohlari va sayyohlik kompaniyalari uchun mo‘ljallangan.
Nashr tirajining umumiy miqdori 10 ming nusxada beriladi. Ushbu ma’lumotnoma 2015-yilning sentabr oyida nashr qilinishi rejalashtirilmoqda.
Oxirgi vaqtlarda Rossiyadan O‘zbekistonga tashrif buyurayotgan sayyohlarning sezilarli darajada oshishi Rossiya tur kompaniyalari va agentliklari uchun O‘zbekiston asosiy sayyohlik yo‘nalishiga aylanganligini hisobga olgan holda, yo‘lko‘rsatkichning yaratilishi Rossiya va O‘zbekiston turizm bozori uchun zarur va dolzarb jarayon hisoblanadi.
Ma’lumotnoma Rossiya kitob do‘konlari, chakana savdo tarmoqlari, supermarket tarmoqlari, xalqaro aeroportlarda joylashgan savdo maskanlarida, duty-free magazinlarida, sayyohlik agentliklarida, internet do‘konlarda va kitob ko‘rgazmalarida savdoga chiqariladi.
140 sahifadan iborat bo‘lgan ushbu yo‘lko‘rsatkich rossiyalik sayyohlarni O‘zbekistondagi sayyohlik marshrutlari, ko‘zga ko‘ringan joylari, muzeylari, mehmonxonalari va restoranlari, ayniqsa mamlakat madaniyati, aholi urf-odatlari va an'analari bilan tanishtiruvchi, shuningdek amaliy maslahatlar beruvchi manba sifatida nashr qilinishi ko‘zda tutilmoqda.
Yo‘lko‘rsatkich 3 bo‘limdan iborat bo‘ladi.
“Sayohatni rejalashtirish” bo‘limida rossiyalik sayohatchilar O‘zbekistonning iqlimi, sayyohlik mavsumlari, transport tizimi, faol dam olishning turlari, bolalar bilan dam olish imkoniyatlari haqida bilib olish mumkin.
“Mamlakat va aholi” bo‘limida mamlakat tabiati, madaniyati va dini to‘g‘risida qisqacha ma’lumotlar berib o‘tilgan. Shiningdek, milliy an’analar, ovqatlar va ichimliklar, respublikaning bayramlari va festivallari to‘g‘risida gapirib o‘tilgan.
“O‘zbekiston bo‘yicha yo‘nalishlar” bo‘limida 9 ta eng taniqli sayyohlik marshrutlari bo‘yicha ma’lumotlar berilib, ularda asosan Samarqand, Buxoro, Xiva kabi qadimiy shaharlar, Toshkentning tog‘ yonbag‘irlarida joylashgan kurortlar, Shimoliy va Janubiy O‘zbekiston (Nukus, Qashqadaryo, Surxondaryo), Farg‘ona vodiysi, Zomin va Aydarko‘l maskanlari bo‘yicha to‘liq ma’lumotlar berilgan.
Shuningdek, yo‘lko‘rsatkichga O‘zbekiston va Toshkentning flip-xaritasi ilova qilingan. Namoyishda ishtirok etgan ko‘zga ko‘ringan olimlar, siyosatchilar va jurnalistlar yo‘lko‘rsatkichning asosiy mazmun-mohiyati, tuzilishi, dizayni to‘g‘risida umumiy fikrlarini bildirib, ushbu qo‘llanma nafaqat Rossiya sayohatchilariga, balki boshqa mamlakatlardan tashrif buyurayotgan sayohatchilar uchun ham asosiy qo‘llanma bo‘la olishini ta‘kidladi.
Izoh (0)