Qozog‘iston O‘zbekiston bilan chegara hududida Sanoat kooperatsiyasi markazini tashkil etish uchun 50 million AQSH dollaridan ortiq mablag‘ ajratishi mumkin.
Keltirilishicha, Qozog‘iston parlamenti Senati O‘zbekiston bilan chegara hududida “Markaziy Osiyo” xalqaro sanoat kooperatsiyasi markazini qurish to‘g‘risidagi qonunni maʼqulladi. Sanoat kooperatsiyasi markazi Qozog‘istonning “Atameken” va O‘zbekistonning “Guliston” nazorat-o‘tkazish punktlari yaqinida joylashadi.
Qayd etilishicha, mazkur markaz ishlab chiqarish maydonchalari, omborlar va transport infratuzilmasidan iborat bo‘ladi, bu esa yuk tashishni tezlashtirish, logistika xarajatlarini kamaytirish, taʼminot zanjiri ishtirokchilari sonini qisqartirish, shuningdek, yakuniy isteʼmolchi uchun mahsulot tannarxini pasaytirish imkonini beradi.
Markazning umumiy maydoni 100 gektar etib belgilangan. Ushbu hududga mintaqaviy sanoat zonasi maqomi beriladi. Dastlabki hisob-kitoblarga ko‘ra, zarur sarmoyalar taxminan 27 milliard tengeni (taxminan 54 million AQSH dollari) tashkil etadi.
Shavkat Mirziyoyev 18-mart kuni Qozog‘iston prezidenti Qosim-Jo‘mart To‘qayev bilan telefon orqali muloqot qildi. O‘zbekiston—Qozog‘iston strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalari batafsil muhokama qilindi. Savdoni ko‘paytirish, sanoat kooperatsiyasi, transport, energetika, qishloq xo‘jaligi va boshqa sohalarda, shu jumladan hududlar darajasida amaliy hamkorlik bo‘yicha loyihalarni ilgari surish maqsadida o‘zaro muvofiqlashgan choralar ko‘rish muhimligi qayd etildi.
Izoh (0)