USENET 2018: Spikerlarning sara fikrlari

Toshkentdagi International Hotel Tashkent mehmonxonasida bo‘lib o‘tgan USENET 2018 xalqaro digital anjumani bu yil spikerlarning chiqishlari soni bo‘yicha o‘z tarixida hozircha mutlaq rekord o‘rnatib turibdi.

USENET – bu yil ham elektron tijorat, reklama texnologiyalari, medianing rivojlanishi, ijtimoiy tarmoqlar taraqqiyoti omillarini muhokama qiladigan, keyslar bilan bo‘lishadigan hamda savollarga atroflicha javob olinadigan hududga aylandi. Bu yili Rossiya, Qozogʻiston va mahalliy ekspertlar, sohaning ayni vaqtdagi yetakchilari 30 dan ortiq ma’ruza hamda taqdimotlarni havola etishdi. Blokcheyn mavzusidagi chiqishlar anjumanni qoldirmasdan kuzatib boradiganlar uchun bu yilgi kashfiyotga aylandi, deyish mumkin.

“Daryo” muxbiri ushbu chiqishlarda aytilgan e’tiborga molik fikrlarni havola qiladi. Marhamat:

Viktor Yeliseev, Select Communication Group. (Mavzusi: Xayp boshqaruvi. Infosabab – digital rivojlantirishning vositasi sifatida)

Bugun sahifangiz yoki saytingizda biror mavzuni xayp (ingliz tilidagi hype so‘zidan olingan, biror yangilikka doir shov-shuv, vasvasa, ma’lumot tarqatish tendensiyasi) qilishdan avval o‘z hududingiz hamda uning aholisining, ya’ni maqsadli auditoriyangizning qabul qilishidan kelib chiqing. Xullas, har bir xaypning ortida maqsad va shuni amalga oshirgandan keyin nima bo‘lishi haqidagi prognozni oldindan qilish kerak.

Timur Abdulin, “Repost.uz”. (Mavzusi: Nega mahalliy saytlarning o‘zbek tilidagi talqinini tarjimonlar emas, balki jurnalistlar tayyorlashi kerak?)

Albatta, mahalliy saytlarimizning o‘zbek tilidagi talqinini nega tarjimonlar emas, balki jurnalistlar tayyorlashi lozimligini taxmin qilayotgan bo‘lsangiz kerak. Masalan, shaxsiy tajribamizdan kelib chiqadigan bo‘lsam, biz “Repost.uz”’ saytining avvalgi talqinida tarjimonlar xizmatidan foydalanar edik. Ammo keyinroq bu o‘zbek tilida so‘zlashuvchi auditoriya uchun tushunarsiz va talabga javob bermaydigan kontentga aylandi. Hozirda biz jurnalistlar bilan birga ishlamoqdamiz. Endi xabarlarni rus tilidan tarjima qilish emas, balki mualliflik asosida bo‘lishini ta’minlayapmiz.

Bugungi kunda ijtimoiy tarmoqlardagi izohlar u yerda o‘z kontentini yuritayotgan OAV uchun eng muhim ma’lumot sanaladi. Ya’ni, izohlar – bu siz berayotgan ma’lumotga insonlarning reaksiyasi, istalgan turdagi faolligi, qamrovi. Biz Mash agentligini tuzishda aynan insonlarning hissiyotlari, ular bizga berayotgan izohlari, faolligi zamirida yotgan javoblariga suyandik. O‘zimiz eshitishni istagan qiziqarli xabarlarni ularga yetkazib berdik. Qisqa qilib aytganda hissiyotlar jurnalistikasiga urgʻu berdik. Ular bilan ularning tilida gaplashdik. Agar o‘quvchining hissiyotlari bilan hisoblashsangiz, auditoriyangiz siz bilan hisoblashadi. Agar siz shunchaki statistika yoki topda turish uchungina kurashsangiz, auditoriyangiz ham sizni lentada shunchaki qarab o‘tib ketaveradi. Ularning istaklariga, yo‘q, o‘zingizning istaklaringizga quloq tutsangiz, kerakli maqsadga erishasiz. Biz Mash’ni aynan shu prinsip bo‘yicha oyoqqa turgʻizdik.

Unikal bo‘lishga intiling. Xato yozishdan qo‘rqmang, ma’lumotlarni unikal tarzda, boshqalarga o‘xshamaydigan uslubda bering. Mash’da ham shu maqsadda eksklyuziv xabarlar beradigan bo‘lim tuzdik. 12—14 odamdan iborat bo‘lim o‘z ma’lumotlarini ishlash, odamlar bilan suhbatlashish, joylarga borish va shu kabilarni amalga oshirish orqali unikal axborot yaratish bilan shugʻullanishadi. Bundan tashqari “Repost.uz” muharriri aytgan mobil muxbirlik bo‘limi bizda ham bor. Biz ularga aynan qanday kadrlar kerakligini tushuntiramiz, ular bizga yuborishadi. Auditoriya siz istagan kontentni berishi uchun oddiy odamlardan iborat o‘sha auditoriya sodda va tushunarli tilda istagingizni yetkaza olishingiz lozim”.